Un instituto economico independiente institui pa e Organo di Reforma y Desaroyo, COHO lo pone riba mapa cua ta e efectonan presupuestario structural pa permiti cu pensionnan y siguridad social na Aruba ta keda pagabel si mester aumenta edad di pensioen na 66 aña na 2025.

Esaki ta un di e acuerdonan den e landspakket cu Hulanda y Aruba a compromete na dje. Es mas, e obhetivo ta cu Aruba ta hisa e edad di pensioen na 2025, alomenos cu e investigacion independiente, cu mester keda ehecuta den palabracion cu Aruba, ilustra cu e aumento di edad pa 2025 no ta realistico. Di otro banda, e mesun instancia aki lo mester studia e posibilidad pa hasta aumenta e edad di pensioen hasta cu mas di un aña, door di mara e edad di pensioen na expectativa di bida y asina calcula e proposicionnan alternativo. E resultadonan di e investigacion lo keda presenta na Hulanda y Aruba, cu hunto lo evalua e forma con pa ehecuta e proceso. No tin un fecha specifico pa e investigacion ya cu a pasa pa e siguiente agenda di ehecucion.

Di otro banda, SVB a cuminza haci su analisis interno pa duna Gobierno un conseho riba e proposicion aki. “Nos a haci nos calculonan y ta den proceso pa traha un conseho pa Gobierno,” Edwin Jacobs, Director di SVB a bisa Bon Dia Aruba, agregando cu e calculonan ta pa mira con por cumpli cu locual ta acorda den e pakete pa Aruba.

ROPV mester keda implementa

Pero e reforma mester ta dirigi riba empresaria y clima di inversion, y pa promove esakinan ta importante cu ta optimalisa e proceso di permiso, ademas cu mester baha e costo pa haci negoshi y eliminacion di e burocracia. Consecuentemente lo tin un revision integral di entre otro leynan y reglanan pa asina bin cu proposicionnan cu despues mester keda implementa. E fecha pa duna e instruccion di e investigacion aki lo mester sosode pa 15 di Maart. E pasonan cu ta sigui lo sali di e instruccion pa investigacion.

Hunto cu esaki mester bin transparencia y claridad riba e Plan di Ordenanza Teritorial, esta e ROP. E ROP ta di 2019, pero manera tabata e caso na 2009, no tin e ROPV cu ta e cuadro di leynan cu ta mara tur hende na e ROP. Den e landspakket, Hulanda y Aruba a corda cu e ROPV mester ta implementa pa 30 di September 2021. E proposicion di ROPV ainda no a bay Parlamento, pero DIP a tene diferente sesion cu gruponan pa yega na e asina yama voorschriften, esta e regulacionnan cu ta conta pa henter comunidad, pero cu mester bira un ley ainda.

Pa 15 di Februari en todo caso mester a yega na un momento di midi pa e procesonan cu mester keda digitalisa.

Mester bisa cu ainda Parlamento di Aruba no a pasa e cambio den e Landsverordening Toelating, Uitzettingen Verwijdering, LTU-W, e implementacion di e decision pa famianan di ambtenaarnan Hulandes cu mester traha na Aruba tambe haya entrada automatico pa aplicacion di e ley, sin mester pasa e trayectoria di pidi permiso.

Salud

Riba tereno di Salud, e enfoke di e agenda di ehecucion ta pa hisa y mantene e capacidad di test pa COVID-19, y introduccion di un supervision di e sindroma. Tambe ta garantisa suficiente capacidad di air-ambulance y percura cu tin suficiente vacuna contra COVID-19, y lo continua cu e programa di vacuna cu a inicia e siman aki.

Pero den cuadro di eficiencia, lo pone riba e papel e oferta di servicio den cuido den e diferente hospitalnan den e paisnan Hulandes den Reino, y si ta ofrece e mesun servicio na tur. Otro ineficiencia tambe mester keda identifica y elimina pa medio di creacion y ehecucion un plan di cooperacion di hospitalnan regional den area Caribense den Reino y a base di palabracionnan administrativo. Esakinan mester inclui e reduccion di e cantidad di pacientnan cu mester bay den exterior (Colombia, otro pais), y cu por haya tratamento den un di e hospitalnan regional den e paisnan di Reino Hulandes den Caribe. Esaki ta encera tambe cu mester bin specialisacion den cuido. E hospitalnan hunto lo haci compra di medicina, medio, material y aparatura y lo percura cu e training y planificacion di elevacion di capacidad di personal di cuido sosode den region mes. Di e forma aki lo reduci e gastonan pa e training necesario cu ta sosode den exterior.

Tambe lo racionalisa e cuido di laboratorio y reduci e cantidad di laboratorio; tur specialista medico cu ta duna servicio cubri pa AZV mester drenta den servicio di salario di hospital; meter reevalua e metodo di financiamento y tarifanan di e cuido di e di dos liña hunto cu AZV y e autoridad di cuido di Hulanda. Segun e agenda di ehecucion, e palabracionnan cu a haci den e consulta di e cuater paisnan di Reino ta locual ta guia implementacion di e medida aki. E palabracion ta riba mes, pero no tin un fecha ainda ki tempo e lo keda ehecuta. Di otro banda, lo bin cu proposicionnan nobo, cu mester keda implementa, a base di investigacion existente of adicional riba eficiencia, incluso e pago y efectividad di cuido na Aruba. Aki ta considera recalibracion di e pakete basico di AZV y introduccion di contribucion propio.

E siguiente pasonan ta resultado di e tarea di investigacion cu Aruba mes a haci, esta con ta controla y maneha COVID-19; garantisa continuidad di cuido agudo; y finalmente, ekipa cuido eficientemente e realisa cu e structura di cuido ta robusto pero tambe pagabel