Director di SVb a duna un resumen di e situacion di e banco di asegurado. Den su declaracion el a repasa e operacion di SVb, cifranan financiero como tambe e clientenan cu tabatin aña pasa y awo.

Ir. Edwin Jacobs a splica cu prome cu e pandemia, esta na februari 2020, e banco tabata conta cu 41.635 cliente cual a cuminsa baha for di luna di maart y e tendencia aki  a sigui den henter aña 2020, cu excepcion di dos luna (mei y november).

Haciendo un analisis, a constata cu for di februari aña pa 15 di april, 2021, a saca 2971 persona cu tabata registra. For di februari pa december 2020 a saca en total 3222 trahado for di e sistema y a bin 251 trahado nobo acerca den e periodo di januari pa april, 2021.
Otro cifranan di 2020 ta mustra cu SVB na inicio di e pandemia tabatin 43.335 relacion di trabou registra na SVb y na december esaki tabata 39.723. Otro datonan ta mustra cu di februari pa april 3169 relacion di trabou a wordo finalisa na SVb.

Februari pa december 2020 un total 3622 relacion di trabou a wordo finalisa. Pa loke ta inscripcionnan nobo, esaki tabata di januari pa april 2021, tin 453 persona nobo a inscribi na SVb. “E prome kwartaal di 2021 ta mustra señalnan di recuperacion pero hopi leve,” ir. Jacobs a bisa.

Den cantidad di doñonan di trabou si ta mira un otro tipo di desaroyo. Na februari, 2020, tabatin rond di 4 mil dunado di trabou y solamente crecemento tabatin den e cantidad di dunado di trabou. Pa awe e ta 4304 cu ta casi 80 dunado di trabou nobo den 2021 pero for di februari aña pasa pa april 2021 e ta bira en total 335 dunado di trabou nobo.
E indicacion di un analisis preliminar ta cu e cantidad di dunadonan di trabou nobo ta di negoshinan chikito.

Primanan cu SVb ta ricibi pa seguro di malesa y accidente aña pasa esaki tabata 24 miyon den henter aña. Y e aña’ki entre januari y februari a ricibi apenas 100 mil florin menos cu e mesun periodo di aña. Pues e impacto di e pandemia no a afecta mucho e entradanan di SVb for di prima.

Pa loke ta e primanan di AOV y AWW den e periodo di maart pa december, compara cu e mesun lunanan di 2019, a constata un caida di 20% den entrada di primanan. Di otro banda si compara e entradanan di januari y februari 2021 cu esunnan di 2020, e ta un caida di 11.3%. Si e trend aki sigui igual, e fondo di reserva lo wanta te december, contrario na e pronostico anterior. “Pero nos lo sigui informa comunidad di cada desaroyo,” Jacobs a bisa.
SVb tin den su fondo di reserva un suma di 53 miyon florin disponibel pa cumpli cu su obligacionnan cual ta suficiente pa 2021.