E recuperacion di fondo di AOV ta rekeri mas tempo cu SVb a premira pa motibo cu e primanan ta keda atras.
E proceso di reforma pa fortalece e fondonan administra pa Banco di Seguro Social (SVb) pa trece un balansa financiero den e fondonan aki ta canando. Entre nan e fondo di pension di behes (AOV) cu tabatin su retonan grandi. Pero na 2014 a cuminsa cu e proceso di recuperacion di e fondo importante aki pa nos pensionadonan y comunidad.
E aña aki, director di SVb, Edwin Jacobs tin cu bisa cu e cantidad di prima no ta yegando na e nivel cu nan a proyecta na prome instante, y pa tal motibo nan a adapta esey. Pero el a laga sa cu e situacion aki no ta trece problema na e proceso di recuperacion di e fondo di behes. “Solamente cu e tempo cu bo a premira pa recupera a brake un rato.”
Posibilidad aumento suma pensioen
El a informa cu banda di percura pa haya entrada y controla e gastonan di e fondo di AOV, e suma di pensioen tambe tin su atencion, ya cu e aña aki e suma di pensioen a wordo aumenta cu 25 florin pa esun soltero y cu 42 florin pa esun cu ta casa.
Sr. Jacobs ta bisa cu nan ta haciendo ehercicio pa wak si lo por hisa e suma di pensioen otro aña. Aunke mester menciona cu adaptacion a base di cifra di inflacion no ta posibel, ya cu durante e ultimo 12 luna e indice di inflacion no a subi. Pero Sr. Jacobs ta splica cu tin proposicion cu tin cu bay riba e posibilidad di un aumento di e suma di pensioen.
Proyeccion
El a declara cu e gasto di loke ta e fondo di AOV ta comporta su mes di acuerdo cu nan proyeccionnan. For di 1 januari 2015 a reforma relaciona cu e aumento di edad gradualmente te cu 65 aña a drenta na vigor. E ta aumenta cu mita aña anualmente y e aña aki e ta na 61 aña. E aumento aki ta nifica cu e prome mita di aña no ta bin pensionado acerca; y e otro mita si ta drenta mas pensionado acerca. Pues actualmente SVb ta den e periodo cu tur luna nan ta bay wak cu nan cantidad di pensionado ta aumenta, y logicamente e gasto di e fondo ta aumenta.
Mientras cu den e prome mita di aña, ya cu no ta bin mas pensionado acerca, e suma di pension ta baha pa motibo di fayecimento. Ta asina cu entre 40 pa 50 pensionado promedio pa luna ta sali for di e sistema di pension di SVb pa causa di fayecimento. Sr. Jacobs: “E recuperacion di e fondo di AOV ta ariba un bon caminda keto bay, y nos ta keda haci nos ehercicio pa wak con nos ta keda fortifica esaki.”
Ademas director di SVb a bisa cu e fondo di AOV ta keda uno inmensamente importante pa e poblacion na Aruba, ya cu basicamente un 80% di nos grandinan -cu ya caba ta ariba di 20 mil pensionado- ta depende exclusivamente di e pension di AOV. Esaki ta haci cu e reto pa e fondo aki mester ta uno di recuperacion. E di dos ta esun di mantene e pension pa keda duna e pensionadonan un accesibilidad na calidad di bida.
Na final el a laga sa cu logicamente e fondo tin su retonan pero e ta moviendo den bon direccion. SVb ta kere cu e reapertura di e refineria lo contribui positivamente na e primanan, locual ta fortifica e fondo aki. Mientras cu e gastonan mester keda mantene nan locual SVb ta proyecta. Sin lubida cu tur cos ta indica cu expectativa di bida di nos hendenan ta sigui aumenta tambe tur aña.
