Diahuebs mainta Comerciantenan Uni Aruba (CUA) a tene un rueda di prensa caminda presidente di CUA, Franses Ponson, a trece pa dilanti preocupacion cu algun miembro di e organisacion tin pa loke ta trata e situacion di pago di subsidio di salario na SVB. Ariba diabierna, director di SVB, Edwin Jacobs, a tene un conferencia di prensa den presencia di medionan di comunicacion local caminda el a reacciona ariba CUA su preocupacionnan y ta aclara algun punto cu CUA a trece pa dilanti cu no tabata corecto.

Jacobs a indica cu nan a sigui cu hopi interes e conferencia di prensa di CUA y a expresa cu nan a keda un poco sorprendi cu e periodo cu a wordo menciona di cinco luna pa haci pago di subsidio pasobra den sistema SVB, segun el a splica, cinco luna no ta aparece como un tempo determina pa haci pago. “P’esey nos a keda cu hopi interogativa y mi ta kere pronto nos lo reuni cu CUA”, Jacobs a bisa.

E director a recorda cu na momento cu e pandemia di COVID-19 a yega, Gobierno di Aruba a bin cu un programa pa sostene companianan pa retene cuponan di trabou pa companianan cu ta wordo afecta pa e medidanan cu a wordo tuma pa contene e efectonan di COVID-19.

Un programa a wordo diseña caminda empresanan cu tabata vulnerabel na e medidanan por a aplica pa un subsidio. Jacobs a splica cu un variabel hopi importante pa determina e suma di subsidio ta e perdida di benta. Den prome instante e companianan tabata ricibi un adelanto basa ariba perdida di benta calcula den e luna cu nan ta ricibi e subsidio.

Despues SVB ta determina exactamente kico e perdida di benta ta pa asina determina exactamente cuanto subsidio e compania tin derecho ariba dje. E calculacion di perdida di benta di un empresa ta basa ariba declaracion di BBO, cual Jacobs a remarca ta e unico caminda cu nan tin pa por determina e perdida exacto di benta pasobra tur compania tin e obligacion di declara BBO.

Sinembargo, Jacobs a señala, e problema a bin dilanti ora cu tin empresanan cu no ta cumpli cu declaracion di BBO. “Pues un compania cu nunca a declara BBO of no ta declara bon, belasting ta manda bisa SVB cu e empresa aki no tin perdida e ora nos tin cu recupera back tur e subsidio cu nos a paga pasobra e no a cumpli cu su BBO, esey ta hopi importante”, el a enfatisa.

El a sigui splica cu na december SVB a bay Parlamento di Aruba cu Minister di Finanzas y Minister di Economia pa loke ta trata e landsverordening pa cu loonsubsidie. Durante e reunion parlamento a pidi for di SVB pa presenta un plan di cobransa di e subsidio cu a entrega di mas.

SVB a presenta un plan di con nos ta bay cobra esaki back y den e plan aki nan a indica cu si e debe di un empresa ta menos cu mil florin, e compania ta ricibi dos luna di tempo pa paga e debe back. Si e debe ta entre mil y dies mil florin, e tempo pa paga ta seis luna y asina e ta sigui subi na medida cu e debe ta mas grandi te ora cu yega te 24 luna. .

Na principio di aña na momento cu e ola di Omicron a afecta e recuperacion economico di Aruba momentaneamente, Jacobs a splica cu nan a agrega extra tempo ariba locual nan tabatin ariba e schedule inicial. El a aclara cu den caso cu un compania ora cu e haya su cobransa y e manda bisa cu e no tin posibilidad di pag’e, SVB ta ofrece algo adicional.

Por ehempel compania cu tin debe bao di mil florin y a ricibi nan cobransa pa paga den dos luna, e ora e compania cu no por haci e pago den dos luna ta haya tres luna pa paga. Esnan cu a haya 18 luna ta haya cinco luna mas acerca y asina e ta sigui subi pa asina facilita e areglonan di pago. Y si despues di esaki e compania indica cu nan no por paga den e tempo ey toch, SVB ta ofrece otro opcion na e companianan aki.

“Ainda despues cu nos duna e companianan e extra tempo pa paga back y nan bisa cu nan no por paga, nan por haci peticion pa nos determina nan capacidad di pago. Pero e capacidad di pago no ta e compania ta determina esaki, nos tin nos forma cu nos ta usa caba pa pago di primanan di seguro di malesa y accidente pa calcula e capacidad di pago. Pa esaki e empresa tin cu duna nos algun informacion esencial pa determina realmente su likides den tempo y determina kico e por paga”, Jacobs a remarca.

E director a enfatisa cu den nan schedule di pago no tin ningun caminda poni cu mester paga e debe den cinco luna. El a aclara cu e schedule ta cuminsa na dos luna, despues 6, 8, 10, 12, 18 y 24 luna. Esaki ta e schedule basico. E schedule caminda ta tene consideracion cu e situacion financiero ta 3, 8, 10, 13, 15, 23 y 30 luna, y pa haya un areglo fuera di e schedule aki mester entrega informacion y documentonan adicional cu SVB ta pidi.

“E intencion no ta pa kibra niun compania. Nos a yega asina leu cu nos a logra pasa e pandemia y cu nos ta den recuperacion pleno”, el a bisa. Jacobs a agrega cu locual nan ta desea ta pa cumpli cu e palabracion cu tin basa ariba decision cu Conseho di Minister di Reino a tuma cu pa e aña aki nos mester yega 49 miyon florin minimo pa loke ta trata e entradanan.

Jacobs a informa tambe cu te cu aworaki SVB a logra cera 517 areglo di pago cu ta representa 14.3 miyon florin, pero tin 917 compania cu no a reacciona y esey SVB ta lamenta pasobra si no reaccion SVB ta obliga e ora di tuma pasonan necesario. El a sigui na recomenda e 917 dunado di trabou cu no a reacciona ainda ariba e e-mailnan di SVB pa tuma contacto mas rapido posibel pa evita cu nan ta yega na e proceso cu ta sigui despues cu nan manda notificacion y recordatorionan.

“Nos ta habri pa yega na algo factibel pa tur dos banda y nos tambe tin cu cumpli cu Gobierno di Aruba y si nos tur coopera nos por sali afo sin necesidad di trece den peliger existencia di cualkier empresa”, Jacobs a expresa.