Den cuadro di existencia di nos Banco di Seguro Social (SVb) su 30 aña di existencia –desde inicio di nos Status Aparte- nan a cuminsa un fase di digitalisacion di nan servicio pa asina nan por bay mas na vanguardia di e mundo di awendia.
Director di SVb, sr. Edwin Jacobs a bisa cu e instituto aki a cay atras den digitalisacion y nan mester percura pa yena e espacio aki haciendo uzo di tecnologia moderno di comunicacion pa yega na e ciudadanonan. “SVb ta bay drenta e era di sociedad di informacion”, asina cu hopi emocion sr. Jacobs a bisa.
Pa ataca e problema aki, SVb a formula un vision 2020, caminda pa aki cuater aña e meta ta pa tur servicio di e instituto aki ta digitalisa. Sr. Jacobs a laga sa cu nos pueblo tin un grado di uzo di celular na Aruba hopi halto. Y compara mundialmente nos tin un grado di uzo di Internet hopi halto tambe, pero e ta admiti cu den SVb nan a keda atras pa probecha e instrumentonan moderno aki. Pa motibonan financiero a impedi SVb pa sigui cu nan proceso di digitalisacion cu a cuminsa na aña 90 hopi bon. Pero fei di 2000 pa dilanti, nan a keda atras pa motibo di e situacion financiero di nan fondonan y tabatin diferente otro problemanan cu tabata demanda mas prioridad.
Nan ta trahando pa bin bek den uzo di tecnologia avansa y optimal pa digitalisa nan servicio. “Ora cu nos ta bin bek ta pa nos ta dilanti di tur e otronan cu nos”, segun sr. Jacobs. El a bisa cu e software por wordo instala den un aña, pero no ta e software so, sino e capacitacion di esunnan cu ta bay haci uzo di dje.
E ta haya cu unabes cu SVb ta pone tur tipo di informacion riba nan plataforma digital, nan lo ta accesibel fei di un conopi di bo celular, pa asina nan por bay mas leu pa informa y conscientisa comunidad.
Nan ta trahando riba un proyecto di informacion y conscientisacion specialmente pa e generacion nobo cu a drenta mercado laboral, pa nan ta mas consciente di importancia di un banco di seguro social. Eventualmente pa luna di juni SVb ta bay lansa un campaña di un forma cu SVb lo por informa nos comunidad.
Financiamento
E vision 2020 ta demanda un inversion di alrededor di 2.5 pa 3 miyon florin. Sr. Jacobs a anuncia cu e departamento di Pension ta esun prome cu ta bay conoce un digitalisacion total. Ya den esaki a inverti un 2 miyon florin pa nan por pone e programa manera cu e ta. Ainda ta falta un ultimo step cu e ta spera cu prome cu fin di 2016, e lo wordo anuncia. E step aki tin di haber cu peticionnan pa pension, ya cu e persona no mester presenta na oficina di SVb pa haci esaki, sino fei di cas y/of oficina caba nan lo por diligencia nan peticion di pension.
Asina e proceso digital aki lo bay ta pa tur diferente peticion, ya cu tur servicio cu departamento di pensioen ta dunando actualmente den nan oficina, nan lo bay haci accesibel tambe via Internet. E ta haya cu hopi pensionado entre 60 pa 70 aña a bay curso di computer, y nan a siña riba nan maneho, pues pa nan ta algo hopi comun. Pa esun cu no sa di computer e balie di SVb lo keda habri pa sigui brinda nan un servicio personal.
E financiamento di e proyecto aki ta bay di tal forma cu e placa cu SVb ta ricibi di prima, ta wordo uza pa administracion di e fondo. Pues e inversion ta bin di e primanan mes. El a splica cu tur e placa inverti ta cay den e parti di administracion di e fondonan. Ya cu e inversion aki ta facilita e proceso di administracion y tambe ta bay duna transparencia.
Sr. Jacobs a bisa cu doñonan di trabou lo beneficia di e sistema aki ya cu nan lo por tin acceso na e file di su cuenta personal den caso cu e no tin esey. Tambe nan lo por haya sa kico nan ta debe SVb y kico e institucion aki ta debe nan, etc… Ademas –segun director di SVb- mundialmente e institutonan di siguridad social ya a pasa e fase di digitalisacion caba, cu apenas SVb a cuminsa drenta den dje formalmente.
Vision 2020
P’esey nan a bin cu un vision 2020 pa asina nan por tin suficiente tempo pa internamente SVb su trahadonan adapta na e sistema aki pa medio di training necesario pa nan bay pareu cu e proceso nobo. Pero tambe cu SVb lo por acerca e doñonan di trabou y mustra nan e facilidad di e sistema aki. “E ta full un proceso cu ta andando…”, el a bisa.
Igualmente el a laga sa cu 2020 lo bay tin hopi retonan pa SVb. El a bisa cla y raspa: “E retonan no ta bay caba tanten cu nos ta sirbi hende”. Ya cu cada generacion ta trece su reto y SVb como administrado di e fondonan di siguridad social tin cu ta bon prepara tambe pa atende cu e retonan aki. Tambe pa atende cu e exigencianan cu e clientenan nobo ta bay demanda fei SVb.
