Riba e pregunta na ki momento un persona por sali di cuarentena of ta ser considera recupera di covid-19, e contesta ta lo siguiente.
Un persona ta ser considera recupera di covid-19 despues di a hiba un combersacion telefonico cu un profesional di DVG of a contesta algun pregunta via Aruba Health App di Departamento di Salud Publico riba desaroyo di su sintomanan cu a transcuri y su estado di salud actual, segun un comunicado di prensa.
E combersacion aki entre DVG y e pashent ta sucede entre 7 cu 14 dia despues di e resultado di test positivo.
Pa e motibo aki ta importante pa tur persona cu ta bay haci e test di Covid-19 duna nan informacionnan corecto y ta pendiente di nan telefon na tur momento, pa si DVG tuma contacto cu nan.
A base di e resultado di e combersacion y preguntanan haci, DVG por duna autorisacion na e pashent pa sali di isolacion of por ordena e pashent pa keda isola. Un test negativo pa sali di isolacion no ta necesario cu excepcion di esnan cu ta trahadonan den cuido medico.
Asegurado di SVB mester yama SVB pa informa di su resultado positivo y DVG tambe lo confirma esaki cu SVB.
SVB segun protocol di DVG ta duna tur pashent un fecha tentativo pa regresa trabou despues di 14 dia. Si na di 14 dia DVG no duna e pashent autorisacion pa sali di isolacion, e pashent lo tin di informa SVB mesora.
E persona cu ta wordo instrui pa DVG pa bay den cuarentena debi cu e ta of tabata den riesgo di contrae e virus, ta bay den cuarentena obligatorio pa 7 dia cubri pa SVB, si ta un asegurado di SVB. Si durante e periodo di 7 dia aki sintoma aparece, mester yama dokter di cas pa test y si e resultado di test ta uno positivo, mester avisa SVB of bo seguro di esaki.
