Un fondo administra pa Banco di Seguro Social (SVb) cu semper tabatin su reto financiero cu ne, ta esun di seguro malesa. Aña pasa a bin cu reforma pa fortalece e fondo aki. Aworaki den e prome kwartaal di 2017, e fondo di seguro di malesa a cera cu un cifra positivo di 1 miyon florin.
Segun director di SVb, Edwin Jacobs e desaroyo positivo aki ta wordo causa pa dos aspecto: Primeramente e acuerdo di cooperacion of intercambio di informacion cu SVb a cera cu Dimas. E fruta di acuerdo aki ta wordo mira den e cantidad di trahadonan cu tin necesidad di permiso y cu no tabata inscribi den SVb -y cu tabata traha sin proteccion- a aumenta keto bay.
E di dos desaroyo tin di haber cu ora a wordo reforma e seguro di malesa, Parlamento a otorga SVb e autoridad di duna multa. Na e momento ey, SVb a ripara tambe un crecemento enorme di registracion cu no ta bahando. Despues di luna di mei 2016, el a sigui manifesta su mes durante 2017. Na januari ultimo, SVb tabatin 1485 registracion nobo; 1200 na februari, 1500 na maart, 1200 na april y cu posibilidad cu nan lo yega na 1200 na luna di mei. “Si nos ta uza termino di turismo nos ta den un aña caba di high season”, sr. Jacobs ta bisa.
Cantidad di asegurado
Nan a pasa di 39.848 trahado sigura na januari 2016 pa alrededor di 43.363 asegurado na luna di mei 2017. Casi 5 mil trahado nobo cu no tabata traha proteha segun nos ley, a drenta den e sistema di proteccion social di SVb. “Aworaki nos tin e certeza cu nos tin 43.363 trahado trahando proteha na Aruba”, el a bisa. Esaki debi na gran parti na e colaboracion entre SVb y Dimas y tambe pa e introduccion di e boet administrativo cu lo drenta na vigor entrante otro luna.
E cupo di trabou cu ta sigura den SVb a pasa di 41.569 pa 49.193 cu ta e cifra reciente di 29 di mei ultimo, pues casi 6 mil cupo nobo. E cifra aki tin di haber cu persona cu ta traha ya sea full-time y part-time otro caminda. Por ta e part-time no tabata registra na SVb, loke awor si ta sosodiendo, ya cu SVb ta bin realisando control dia y anochi den e sitionan di trabou.
Sr. Jacobs a expresa su satisfaccion cu e comportacion di e seguro di malesa, ya cu un di e principionan di siguridad social ta “siguridad social pa tur”. E ta mira cu nan ta yegando na e meta aki.
Empresa registra
Di otro banda e cantidad di empresa registra na SVb a aumenta. Di 3.227 empresa registra dia 1 di januari 2016, nan a pasa pa 3.539 empresa. Alrededor di 300 empresa adicional. Bon Dia Aruba a puntra director di SVb cual ta e causa di e aumento aki? Jacobs a indica cu nan no ta empresanan cu a wordo institui aña pasa, sino cu nan tabata empresa cu tabata t’ey, pero cu tabata opera; y no tabata registra cerca SVb. “Nan tabata traha den e circuito preto. Aworaki a bin e circuito blanco!”, el a bisa.
E desaroyo aki ta positivo tambe pa SVb, ya cu mas inscripcion ta nifica mas entrada pa e fondo. Pero tambe ta nifica mas gasto logicamente. Den un situacion asina gasto no por ta un problema, pasobra –segun sr. Jacobs- e problema ta pa SVb por cumpli cu su filosofia cu e trahadonan no por traha sin proteccion social.
