Mediante un publicacion riba nan FB page, Fundacion Orguyo a informa cu SVb a anuncia su maneho pa cu matrimonio di mesun sexo basa riba e sentencianan reciente di Corte den Prome Instancia di Aruba; Corte Comun di Husticia di Aruba, Curaçao, St. Maarten, Boneiro, Saba y St. Eustatius; Corte Supremo di Hulanda y Colegio di Apelacion di Aruba.

Banco di Seguro Social di Aruba ta informa cu ta invita tur persona cu desde 1 di mei 2021 pa e fecha actual ta considera di tin derecho riba:

Pensioen di biehes (AOV) pa pareha, pa motibo di a alcansa of tabata tin edad di pensioen den e periodo menciona y ta of tabata casa cu un persona di mes un sexo cu no a yega edad di pensioen;

Pensioen di viudes, pa motibo di tabata casa cu un asegurado di mes un sexo y cual a fayece den e periodo menciona;

Pa entrega nan aplicacion pa pensioen por haciel’e via nan app MiPensioen of por contact nan departamento di Pensioen via telefon 5272760, via email pensioenen@svbaruba.org, of via Whatsapp +2975272760 (mensahe so – no por yama via Whatsapp).

Desviando di articulo 11 inciso 3 di ley di AOV y articulo 15 di ley di AWW, SVb lo ta aplicando un areglo di transicion te cu 31 di december 2024.

Manera ya caba ta conoci for di 13 di juli ultimo, Corte di Casacion na Den Haag a dicta su sentencia den e caso di apertura di matrimonio pa parehanan di mesun sexo. Corte a dicta cu tanto Aruba, como Corsou, mester habri matrimonio pa parehanan di mesun sexo.

Dia 6 di december 2022, Gemeenschappelijk Hof van Justitie di Aruba, Corsou, Sint Maarten y Boneiro, Sint Eustatius y Saba a dicta su veredicto den cual ta indica cu Aruba y Corsou mester habri matrimonio pa parehanan di mesun sexo. Esaki a keda sosteni pa Hoge Raad na Den Haag den un veredicto altamente spera pa comunidad di Aruba.

E sentencia di Hoge Raad ta indica cu na Aruba y Corsou e leynan actual ta dicta cu matrimonio ta solamente entre parehanan heterosexual, esta un homber y un muhe. Na Aruba, Fundacion Orguyo hunto cu un pareha di personanan di mesun sexo cu kier casa a entama un caso contra Gobierno di Aruba.

E demandantenan ta sostene cu e leynan aki ta contra di e prohibicion di discriminacion cu ta basa riba tratado internacional y Constitucion di Aruba. Cu e caso aki, e meta di demandantenan tabata pa habri matrimonio pa parehanan di mesun sexo.

Den su veredicto Corte den Prome Instancia di Aruba a dicta cu mientras parehanan di mesun sexo no por casa, y si no por ofrece e parehanan aki un otro alternativa, manera por ehempel manera un union registra, e ta contra articulo 8 di derecho di bida priva y famia y articulo 14 di prohibicion di discriminacion di e Convencion Europeo pa proteccion di Derechonan Humano (EVRM) y cu Pais Aruba tabata actua di manera ilegal contra demandantenan.