Banco di Seguro Social (SVb) a dicidi di pospone cu un luna mas,  e aplicacion di e boet administrativo pa e empresanan cu ainda no a cumpli cu nan obligacion legal di registra nan trahadonan cerca e instituto aki.

E intencion tabata cu ayera 1 di maart SVb por a cuminsa cu implementacion di e tarifanan di boet. Pero nan por constata cu ainda tin un grupo grandi cu ta yegando cerca nan pa registra, y cu administrativamente ainda nan no por a duna e servicio eynan. “Esey ta e motibo tambe cu nos a tuma e decision di larga e proceso di gracia cu un luna mas”, asina director di SVb Edwin Jacobs ta bisa Bon Dia Aruba.

Proteccion
E ta recorda cu den cuadro di e cambionan di ley cu a keda introduci 1 di juli 2016, parlamento a otorga na SVb e autoridad pa duna boet administrativo den caso cu nan ta constata na pia di trabou cu tin trahadonan cu no ta sigura. Pa e motibo ey, nan a bin cu un periodo basta largo di gracia pa duna e doñonan di trabou e oportunidad pa nan inscribi. Nan a larga e periodo di gracia aki dunando e luna di maart cu a caba di cuminsa tambe pa inscribi trahadonan. Manera cu SVb tin e structura di e multanan cla; esaki lo keda conoci pa e doñonan di trabou mediante un e-mail directamente cerca nan y tambe den media local.

Sr. Jacobs a aclaria cu intencion di SVb no ta di duna multa, sino cu nan intencion ta pa e trahadonan na Aruba ta traha sigura y cu proteccion.  E ta splica cu e boet ta solamente un instrumento pa nan stimula e doño di trabou pa cumpli cu e ley cu ta na bienestar di nan trahadonan.

Registracion
SVb a cera luna di februari ultimo cu 1200 trahado registra, esaki pa duna un indicacion di e trabou grandi cu nan tin y e cantidad di trahadonan cu a keda registra cerca nan luna pasa. “E ta un cantidad substancial pa SVb”, segun e director. Na januari ultimo e cifra di trahadonan registra a yega na 1483. Esaki ta un refleho pa SVb cu e doño di trabou ta haciendo un esfuerso pa cumpli cu e ley. Logicamente di banda di SVb nan a dicidi di duna nan un extra periodo na e doñonan di trabou, pa nan cumpli cabalmente cu e ley  di seguro di malesa y accidente aki.

Sr. Jacobs ta sigura cu sin duda e cambio di e ley tabatin su impacto riba nan cantidad di aseguradonan y e cupo di trabou registra, ya cu nan ta enorme. Nan ta mira tambe cu e cantidad di e cuponan di trabou sigura cerca SVb a subi di 41.447 na final di 2015 pa 45.354 relacion di trabou pa 2016, loke ta nifica un aumento di mas cu 4 mil relacion di trabou nobo cu a keda sigura na SVb . Den esey na 2016 ta mas of menos casi 2.500 trahado nobo cu no tabata sigura cerca nan.

Pa loke ta e aña aki caba a bin 811 trahado acerca den apenas dos luna; y den cupo di trabou a bin 1500 relacion di trabou nobo entre januari y februari 2017. “Bo ta mira cu e disponibilidad di e doño di trabou t’ey pa cumpli cu e ley akinan.” Encuanto si SVb tin un bista di e trahadonan cu ainda no ta registra, Jacobs a bisa cu si nan ta analisa e cantidad nobo cu ainda ta drentando, esaki ta duna un indicacion cu tin necesidad ainda pa proteccion di mas trahado.

Mirando e cantidad di doño di trabou cu a registra na 2016 cerca SVb, e tabata mas cu 200 doño di trabou nobo a hacie; y e aña aki nan ta pasando 50 doño di trabou cu a pasa registra pa prome biaha na SVb.