Durante conferencia di prensa di Gobierno di Aruba, SVb a ofrece declaracionnan tocante un adaptacion cu SVb a haci den dianan aki tocante e virus COVID-19.
Dr. Mayron Genser a splica cu SVb hunto cu DVG a bin trahando den dianan aki riba prevencion. Ademas el a informa cu SVb ta cambia su proceso di A.O desde awe. Esaki ta un maneho cu SVb no lo atende ningun asegurado cu mester haci control medico personalmente.
Di mesun manera, el a duna di conoce cu esaki ta cuenta pa tur e sucursal sea Eagle, San Nicolas of Sun Plaza, tur asegurado mester meld via telefon cu ta 527-2782.
Nan a cuminsa traha pa por yuda cu sistema di telefon ta di un manera efectivo, pa e motibo aki nan ta pidi pa comunidad tene na cuenta cu e parti di yama no ta mainta so, SVb ta ricibi e yamada for di su clientenan den e parti di merdia tambe.
Di loke ta trata e cuarentena, Genser a menciona cu nan a haya hopi preguntanan riba esey y el a bisa cu SVb ta cubri e dianan aki pa e personanan di sector priva si nan a wordo informa door di DVG pa keda na cas.
Di esaki, el a señala cu nan a haya un carta cu ta registra nan nomber y nan adres cu nan ta obliga di keda den cuarentena. Kiermen nan tin cu keda den e adres cu nan tin registra, unabes cu departamento ta haya e carta en cuestion lo cubri e dianan pa cu e personanan den cuarentena.
Pa loke ta trata sector publico, e personanan no mester meld A.O, e departamento mester regel esey door di Bijzonder vrijstelling van diest.
Ora un asegurado ta yama SVb, Gersen a bisa cu nan lo duna e cantidad di dia cu asegurado mester keda na cas, el a recorda cu ‘asegurado no mester bin SVb pa controla’. Nan ta yama e departamento y lo haci algun pregunta y lo duna indicacion. Unabes cu e cantidad di dia ta pasa si e persona ta bon lo bay traha bek. Si e dia di traha ta yega y e persona ta sinti cu e no ta bon suficiente pa por bay traha bek, e ora ey e mester yama e number indica pa e departamento lo duna mas instruccion pa sigui.
Tur asegurado cu sintoma di COVID-19 tambe lo mester yama y mester corda cu e number di telefon ey ta e unico manera pa notifica A.O te cu proximo aviso, via online no ta bay mas.
Genser a manifesta cu tambe ta existi casonan cu persona lo mester presenta na SVb,, pero esey ta bay via cita. Den principio ta bay riba telefon y despues SVb lo duna un cita. Esaki ta pa motibo di protege tur pashent cu ta na SVb y esunnan cu ta traha na departamento. Den e caso ey e persona mester tene na cuenta e reglanan di distanciamento social y higiena.
Pa personanan cu tin citanan caba cu SVb, Gersen a expresa cu nan mester warda e yamada di e departamento.
