SVB: mester placa pa scapa fondo di seguro malesa

Bon Dia Aruba a publica awe dos articulo riba e fondo di seguro di malesa bou SVB di cual director Edwin JacobsSVB ta bisa cu mester mas placa pa scapa e fondo aki. Mester busca e placa aki specialmente cerca e dunadonan di trabou, asina el a propone na parlamento tambe durante un presentacion:

 “Nos a sketch diferente opcion cu tin. E opcionnan cu tin ta aumento di prima, aumento di premie loongrens, bo tin tambe reduccion di e beneficionan. Nos a busca manera pa mira un solucion den contexto amplio y for di SVB ta conseha aumento di prima loongrens den combinacion cu exonoracion di debenan entre fondonan. Y tambe un transferencia di e fondo di cesantia cu ta un fondo financieramente hopi solido. Un transferencia por yuda e ora e fondo di malesa pa sali for di su problema. Nos a traha diferente scenario cu e meta pa durante di un periodo di 5 aña yega na un saneamento di e fondo di malesa aki.”

A puntra Sr. Jacobs kico ta e situacion/suma necesario aworaki na 2015 bayendo pa 2016 pa SVB por tin un solucion pa esaki. El a  bisa cu e intencion ta cu lo bin un cambio di ley cu lo introduci e cambionan ariba menciona pa exonora e debe entre e fondonan, cual lo reduci e debe pero tambe e patrimonio negativo lo wordo reduci. Locual cu ta keda habri e ora ta e debe cu e fondo tin na doñonan di trabou. Pa soluciona esaki cu e entrada no ta suficiente ta propone pa aumenta e prima di loongrens cual ta aumenta entrada pa cubri e gastonan coriente di e fondo pero tambe pa genera un tiki pa reduci e debe na doño di trabou.

Y pa caba di reduci ful e debe na doño di trabou ta propone pa haci un transferencia di entre 5 pa 8 miyon florin for di e fondo di cesantia, depende di ki scenario wordo scogi pa trata e premie loongrens. Cu e tres pasonan aki ta kere cu por sanea e fondo di malesa dentro di e proximo 5 añanan.

Historia
Den un otro articulo den Bon Dia Aruba sr. Jacobs ta splica dicon e situacion a nace:

Prome cu introduccion di AZV, e fondo di seguro di malesa tabata cubri ademas di compensacion di dia di AO, e ta cubri tambe e gastonan medico. E fondonan, e entradanan prima di e fondo aki nunca tabata suficiente pa cubri e gastonan. E temponan ey a bay over na fia for di diferente otro fondonan, placa pa asina por sigui cubri e gastonan di e fondo. Loke a pone cu e fondo di malesa a yega di tin y tin hopi debe cu hopi debe, manera fondo di cesantia, fondo di AOV etc. E debenan aki den combinacion cu e resultado negativo, ta pone cu e patrimonio di e fondo ta negativo, riba 100 miyon, Sr. Jacobs a bisa.

Y e ora e patrimonio negativo aki door cu gobierno ta garantisa e fondonan di SVB, ta pone cu e patrimonio aki bo ta mire bek den e cuentanan anual di gobierno, bao di e pretensionnan cu gobierno ta tuma pa loke ta trata e fondonan di SVB. “E ta un riesgo pa presupuesto di gobierno, pero tambe ta un situacion cu nos mester bay atende.”

El a sigui splica cu despues cu AZV a keda introduci, a saca e gasto medico for di e seguro y solamente a keda cu e compensacion di e dianan di trabou cu e trahado ta incapacita. E fondo a cuminsa riba bon pia cu un prima di 4%, pero na 2003 – 2005, gobierno a dicidi cu ta saca for di e fondo 19 miyon pasa pa AZV, pa cubri e deficit di e tempo ey di AZV y na 2006 a reduci e prima di e seguro di malesa di 4% pa 2.65% como un forma pa compensa e doño di trabao ora di aumenta e prima di AZV na 2006 y dilanti ta haya e resultado negativo di e fondo y e gastonan mes di e fondo.

“Por mira e tasa di capacidad ta na 2.65% un tasa hopi abou. Pues no tin espacio por bisa cu por reduci gastonan door di reduci beneficio. Ta yega un momento cu tin cu sanea e fondo aki pa asina tambe elimina e riesgo cu esaki ta representa e presupuesto di pais Aruba”, Sr. Jacobs a finalisa bisando.