Director di Banco di Seguro Social (SVb) Edwin Jacobs a duna di conoce cu entrante 27 di september SVb lo haci cambio den maneho contra agresion y intimidacion di nan personal.

SVb ta indica cu lo ehecuta un maneho di lik op stuk/faya bo haya. Esaki en conexion cu un incidente cu a pasa entre un pareha ambtenaar y dokter di control di SVb San Nicolas diaranson mainta ultimo.

Director Jacobs ta splica den un comunicado cu un pareha ambtenaar a presenta pa control medico na SVB San Nicolas diaranson mainta. “E señora, kende ta un maestra di scol, a presenta pa control medico despues cu dokter di SVB a mustr’e cu su comportacion ta stroba su recuperacion. Mi ta bisa cu ta un pareha pasobra e señora no a keda contento ora el a tende esaki. E señora a busca su casa kende a drenta di manera agresivo na consultorio di dokter y a agredi e dokter.”

Polis a presenta y detene e persona cu a uza violencia contra e dokter. E dokter a entrega un keho despues cu el a haya un rapport medico di e agresion cu el a sufri.

“Nos ta condena esaki y nos ta tumando e pasonan pa evita e tipo di agresionnan aki riba nos empleadonan di SVb den futuro’, sr. Jacobs ta expresa.

AO halto bou ambtenaar

Segun sr. Jacobs, SVb a bin na constata pa algun tempo caba cu un grupo di ambtenaar tin frecuencia halto di notifica AO. Ora e empleadonan publico aki yega SVb pa control medico cerca dokter, ‘nan ta bin cu un actitud di informa dokter cu nan ta incapacita pa traha’. Sr. Jacobs ta bisa cu di un manera of otro, e personanan aki ta nenga di somete nan mes na control medico.

“Ora cu nan no haya locual nan kier cu nan actitud di exigi, nan ta bira te hasta intimidando.”

Pa e rason aki sr. Jacobs ta informa cu entrante 27 di september SVb lo ehecuta un maneho di faya bo haya. “Tur forma di intimidacion, sea den palabra, actitud of den e manera cu bo ta pone bo curpa.”

Esaki ta encera cu SVB lo cuminsa duna advertencia den caso cu hende provoca personal di SVb. Despues di tres advertencia, e persona ta haya un prohibicion pa pasa controla na SVb. “E consecuencia di esaki ta cu e persona mester carga esaki pa su doño di trabou.”

Sr. Jacobs a conclui bisando cu SVb a informa Departamento di Recurso Humano di gobierno riba e incidente aki. “Nos ta spera cu lo aplica castigo disciplinario maximo ariba e ambtenaarnan aki. Esaki no ta forma”.

Aunke SVb no ta menciona e identidad, otro prensa a indica cu ta trata di juffrouw di scol hunto cu su casa cu ta traha na CEA, pues ta trata di (semi) ambtenaar.