E seguro general di pensioen cu a drenta na vigor un par di aña pasa como un forma di compensacion pa e seguro di behes (AOV) ainda ta tarda pa e prome grupo cuminsa disfruta di dje. Banco di Seguro Social (SVb) ta calcula cu alrededor di aña 2030 e prome pension cu ta complementa AOV  ta wordo paga, prome cu esey, lubida, segun nan.  

Casi cuater aña pasa e seguro aki a wordo introduci. “ Apenas nan tin tres pa cuater aña  nan ta aporta. Bo no por conta cu bo ta haya algo”, asina director di SVb, Edwin Jacobs ta splica Bon Dia Aruba.

E ta bisa cu si un asegurado lo kier disfruta di e seguro aki hopi bon, e tin cu aporta hopi aña den dje y hopi . “E ta un sistema cu no ta cu bo ta hinca 10 y saca mil. Bo ta hinca 10 y e 10 ey ta produci interes y eynan bo ta saca kisas 20 na largo tempo.”

Preocupacion
Sr. Jacobs a expresa su preocupacion ya cu e sistema di pensioen aki ta parti di e siguridad social riba nos isla . Pero mirando e ultimo noticianan cu a sali den prensa cu e cumplimento di e pensioen aki no ta esun di mas miho.

SVb a manda un proposicion pa gobierno a base di un mocion di Parlamento, pero tambe nan a manda un proposicion na Gobierno pa otorga SVb e tarea di supervision. “Pa nos supervisa cu e doñonan di trabou cu ta retene parti di e prima di e trahado ta deposita esaki  na e compania of instituto di pensioen cu e tin cu hacie. Igualmente pa percura cu tur grupo ta sigura di esaki.”

Segun sr. Jacobs nan ta spera di e contesta di gobierno riba  nan proposicion. E ta kere cu  nan instituto (SVb) ta den condicion pa realisa e trabou di supervision aki. Considerando cu SVb tin di e sector priva  tur trahado registra cerca nan pa controla si tur hende ta cumpli cu ley.

Un grupo cu nan no tin registra actualmente ta e grupo di trahado domestico, pero SVb tin den nan plan pa na aña 2020 bin cu un proposicion pa inclui trahadonan domestico den seguro social. El a bisa cu rond di mundo paisnan moderno a cuminsa haci esaki caba. “Nan ta tambe trahado. Y nan merece proteccion social mescos cu otro trahadonan”, segun e director.

Den nos caso un gran parti di e trahadonan domestico ta bin di afo a base di un permiso y ta importante pa percura pa esey.