Ora cu januari 2017 habri, Banco di Seguro Social (SVb) ta bay cuminsa cu nan control pisa.
Director di SVb, Sr. Edwin Jacobs a declara na Bon Dia Aruba cu den caso cu e instancia aki ta haci un control y constata cu tin trahado cu no ta registra cerca nan, e empresa cu no a cumpli cu ley, lo haya boet. E boet aki por yega te na maximo di mey miyon florin. Te ainda no tin empresa cu a haya e boet caba.
Un biaha mas SVb ta haci un apelacion na doñonan di trabou pa tene bon cuenta cu entrante 1 di juli ultimo, e ley di seguro di malesa y accidente a cambia. E ley aki ta prescribi cu ariba e prome dia di trabou of prome cu un trahado cuminsa traha, e doño di trabou tin obligacion di dun’e su papel di inscripcion pa e pasa oficina di SVb pa inscribi.
Periodo di gracia
El a laga sa cu actualmente nan ta dunando un periodo di gracia pa tur empresa cumpli debidamente cu e ley di seguro di malesa y accidente. P’esey su apelacion ta pa e doñonan di trabou facilita pa nan trahadonan ta inscribi na SVb. E periodo di gracia ta yega te final di 2016.
Seis luna di gracia, SVb ta considera cu ta suficiente pa asina e empresa por cumpli cu su obligacion cu ley pa nan trahadonan ta inscribi cerca nan. Ta importante pa e doñonan di trabou tuma bon nota di kico e ley di seguro di malesa y accidente ta defini como trahado. E ley aki no ta haci ningun diferencia y distincion entre trahadonan, ya cu dilanti di e ley aki, ya cu e ley aki ta considera como trahado tur persona cu ta traha ya sea part-time, on call, etc. y cu logicamente tin un doño di trabou.
Refineria
Encuanto si SVb ta hayando registracion di trahadonan cu ta bay traha den e proceso di reapertura di e refineria, Sr. Jacobs no a mira e cifra di luna di october ainda. Pero locual el a bisa ta cu SVb ta prepara pa atende nan. Ademas e contratistanan tin experiencia caba cu tempo di Valero nan sa cu SVb tin palabracion con nan ta inscribi nan trahadonan.
“Nos tin procedura. Nos tin forma di traha caba cu e contratistanan caba specialmente ora di turn around cu tabatin.” E mesun plan aki ta keda vigente, el a laga sa. Igualmente el a añadi cu SVb lo haci uzo di tur recurso necesario pa nan percura pa e trahado ta wordo sigura, ya cu “trahado ta na prome luga.”
Sr. Jacobs a afirma cu traha sigura ta nan prome meta cu nan tin pa e trahadonan. SVb lo haci tur cos pa percura cu e trahadonan di e refineria por ta sigura tambe cerca nan. Si SVb mester traha weekend nan ta dispuesto pa haci esey, basta cu e trahadonan aki ta sigura. “Miho un trahado sigura nada pasa, cu un trahado no sigura algo pasa.”
Trahado parti handicap sin seguro
Sr. Jacobs ta considera importante pa tur doño di trabou ta na altura di e cambio di ley aki pa despues no mester lamenta of drenta den un disputa cu SVb, caminda dificilmente bo no por Sali afo.
El a comenta un caso cu a sosode prome cu nan a cera un aliansa di cooperacion cu Dimas caminda un trahado cu tabatin entre cuater pa cinco permiso di trabou y cu a sufri un accidente na pia di trabou. Pero e compania cu a firma pa e trahado aki no a inscribi e trahado na SVb. Te hasta lamentablemente e compania aki na aña 2013 a saca e trahado aki for di SVb, mientras cu e trahado a sigui traha pa nan. E trahado aki cu a haya e accidente di trabou a keda pa un gran parti handicap, y e trahado aki no por disfruta di su placa di accidente. “Si el a wordo sigura no y tabatin problema.”
Aworaki probablemente e empresa aki ta laba man of hasta ta bay bancarota pa evita un caso civil entre trahado y doño di trabou, caminda na final esun cu ta sali perhudica ta e trahado mes. Tambe Sr. Jacobs ta haci un apelacion na e hendenan cu ta trahando y nunca bo a presenta na SVb Eagle cu e papel pa inscribi ta nifica cu bo no ta sigura. Si e trahado tin duda libremente nan por yama na SVb ya cu anonimo tambe nan ta tuma e call; y SVb ta percura pa nan departamento di control externo por haci su trabou y percura pa e trahado ta sigura.
Ta importante pa e trahado tambe ta na haltura cu e seguro di accidente ta cubri entre e caminda of distancia mas cortico entre cas y trabou. “Entre cas y trabou riba e caminda mas cortico bo ta haya un accident bo ta cubri pa seguro di accidente.”
No solamente e cubrimento di e seguro aki ta na pia di trabou sino cu e ta inclui tambe e trafico entre cas pa trabou y di trabou pa cas”, el a bisa. Pa SVb importante ta pa e trahadonan traha proteha ya cu p’esey nan seguro t’ey pa un forma colectivo e instancia aki ta percura pa cubri e riesgonan cu e trahadonan ta exponi na dje.
