Director di Banco di Seguro Social di Aruba (SVb) Edwin Jacobs ta bin constata cu cierto preocupacion cu durante e ultimo añanan cu ta algo tradicionalmente tan inherente na generacionnan anterior cu nos ta bayendo perdi.
Sr. Jacobs ta indica cu e generacion dilanti di nos semper tabata desea pa e siguiente generacion tras di nan por gosa di un miho condicion social cu nan mes. “Pero e ultimo añanan door di henter individualismo den comunidad na nivel mundial tambe bo ta mira cu e solidaridad aki y e compromiso entre generacion a cuminsa perde splendor.”
E individualismo aki ta wordo canalisa na nivel politico, unda e individualismo ta wordo poni hopi enfasis riba dje. E pensamento di individualismo aki ta wordo refleha riba con mi generacion lo por tin’e miho, y esun cu ta bini despues di mi su problema e ta. Como director di SVb e ta haya cu e pensamento aki no ta bon, ya cu e ta kere cu nos mester keda solidario cu otro.
“Nos compromiso cu generacion cu ta bin despues di nos, mester ta cu nan ta haya un pais miho di locual e generacion nos dilanti a laga pa nos.” Esaki ta nifica cu nos mester haci un sacrificio cu gana y smaak pa bienestar di nos yiunan.
E ta haya cu algo cu mester prevalece y keda inherente den cada miembro di nos comunidad, esta e compromiso entre generacionnan: “Cu bo ta duna e generacion bo tras un miho luga, un miho planeta, un miho pais y un miho mundo.”
E director ta spera cu pa 2017, nos pueblo lo por dedica mas atencion na e balor di solidaridad aki. Sr. Jacobs ta indica cu ta hopi importante pa mantene siguridad social. Ya cu siguridad social ta nifica cu un grupo tin cu sacrifica pa otro grupo.
