Entrante 1 januari 2017, un grupo di pensionado di Aruba cu ta haya pensioen for di SVB Corsou, lo wak e suma di nan pensioen reduci cu 10%.
E grupo di pensionado cu lo resulta afecta cu e reduccion aki ta e pensionadonan yiu di tera cu tabata biba afo prome cu 1986, kiermen prome cu Status Aparte di Aruba. T’asina cu a bin cambio di ley di pensioen cu a keda aproba na juni ultimo na Corsou cu a trece como consecuencia cu entrante otro aña e grupo di pensionado aki lo ricibi 10% di pensioen AOV menos.
SVb Aruba
Banco Social di Seguro (SVb) Aruba a tuma nota den prensa di e decision di SVB Curaçao pa reduci cierto pensionnan. Director di SVb, Edwin Jacobs a laga Bon Dia Aruba sa, cu nan mes no ta mucho na haltura di e cambio aki; ya cu esaki no ta parti di nan responsabilidad. “Kico e cambio aki ta exactamente, no ta na SVb Aruba pa informa, ya cu nos no tin un responsabilidad den esaki.”
Sr. Jacobs a indica cu SVb Aruba su forma di procede ta cu na momento cu tin un cambio den e leynan aki na Aruba, nan ta informa nos aseguradonan y pensionadonan di esaki. “Pa loke ta e demas informacionnan, no ta na SVb Aruba pa suministra esaki.” SVb Aruba ta actua como facilitado di otro SVBnan den reino, ora di entrega peticion pa pension of pa determina si e persona ta na bida ainda.
Di su banda, director di SVb Aruba, Sr. Jacobs a laga sa na e matutino aki cu e pensionadonan cu a tuma contact cu su persona, el a conseha nan cu si nan no ta di acuerdo, lo mester acudi na Corte pa huesnan evalua nan obhecion.
Cambio di ley na Corsou
Manera e matutino aki a yega di informa, tempo cu Aruba a sali for di constelacion di Antia, Corsou y Aruba a palabra pa e grupo di pensionado aki prome cu Status Aparte pa nan ricibi nan pension for di SVb Corsou.
Recientemente pa garantisa e futuro di nan fondo cu a confronta algun reto financiero, SVB Corsou a conoce algun cambio den e ley cu ta regarda nan fondo di AOV, y tambe pa e pensioen di AWW (weduwen/weduwnaars-of wezenpensioen). Parlamento di Corsou a bin cu cambio di ley pa garantisa e futuro di e fondonan aki.
E cambio ta encera entre otro cu un “ingezetene” mester un adres tambe na Corsou. Banda di un permiso pa biba na e isla aki y mester ta inscribi den nan Censo. Mirando cu e ley ta haci un diferencia entre “ingezetene” y “niet ingezetene”, esun cu a cay den e prome categoria lo haya un pensioen mas halto compara cu e otro categoria. Ya cu esunnan cu ta cay den e di dos categoria como “niet ingezetene”, Corsou ta baha e suma di nan pensioen cu un 10%. Esaki ta conta pa esun cu tin derecho directo riba AOV, AWW y tambe partnertoeslag AOV.
Ademas, esunnan cu no ta biba na Corsou, tampoco tin derecho mas riba un suma anual di gratificacion di Pasco. Pues e cambio di ley aki cu a tuma luga na Corsou a cay riba mal tera cerca e grupo di pensionado cu ainda ta ricibiendo nan pago di pensioen for di SVB Corsou.
