Ayera mainta a traves di un publicacion en vivo riba pagina di Facebook oficial di SVb, director Edwin Jacobs a anuncia e inauguracion di e MiPensioen Kiosk na oficina di SVb situa na Vondellaan. E kiosk aki ta specialmente pa pensionadonan por busca di un manera mas facil y lihe nan documentonan, entre otro declaracion di entrada y e resumen anual di entrada (inkomstverklaring y jaaropgave).
Bon Dia Aruba a tuma contacto cu director di SVb Edwin Jacobs pa puntra tocante con a bin cu e iniciativa aki, si pensionadonan por sigui busca nan documentonan na balie si nan ta prefera esaki ya cu no tur pensionado gusta traha cu tecnologia, y a puntra tambe si lo expande e servicio di kiosk pa ofrece otro tipo di servicio y/of documento na e clientenan.
Jacobs a splica cu desde ya na comienso di añanan 10, e cantidad di pensionado a bin ta crece rapidamente y esey a bin ta pone un presion riba e servicio di SVb pa nan pensionadonan. El a indica cu ampliacion di cantidad di trahado y facilidad no tabata un opcion mas y pa e motibo ey SVb mester a busca solucion mediante tecnologia moderno.
Di e forma ey a introduci na 2016 e aplicacion MiPensioen. El a sigui splica cu a traves di e aplicacion aki nan ta ofrece tur servicio di pensioen, desde aplicacion te pidi e declaracion di entrada.
Jacobs a indica te cu prome cu pandemia a bati na porta SVb a duna servicio via aplicacion y den persona. Pandemia a pone cu nan mester cera nan oficinanan y busca mas forma pa yuda nan pensionadonan y asina a pasa pa un sistema full digital. “Nos por bisa cu nos coleganan ta busca tur manera pa yuda e pensionado,” el a subraya.
El a splica cu SVb a bin ta constata cu pensionadonan tin poco problema pa print algun documento, manera e declaracion di entrada y e resumen anual di entrada. Pa facilita esaki, SVb a inaugura ayera e MiPensioen Kiosk.
Na e kiosk e pensionado of su representante ta scoge y print e documentonan cu tin mester. El a resalta cu manera custumber, SVb lo percura pa tur persona cu tin mester un documento por ricibi esaki y proximamente lo pone den uso un kiosk tambe na oficina di SVb na San Nicolas.
Den caso cu e pensionado of su representante kier haci uso di e kiosk pero no tin su number di pensioen di SVb, por pidi esaki a traves di mensahe di WhatsApp na e number di departamento di pensioen di SVb, ta manda un potret di e ID y nan ta manda e number di pensioen back.
Pa e inauguracion oficial di e kiosk SVb a invita un cliente pensionado pa haci uso di e kiosk pa prome biaha y asina print su documentonan.
Jacobs a remarca cu e ta spera cu esaki por cumpli cu e expectativa y demanda di servicio cu e pensionadonan ta spera di SVb.
Bon Dia Aruba tambe a puntra e director kico por spera pa e aña nobo pa SVb y si ta premira un mehoracion en general di SVb den 2025.
Jacobs a splica cu proyeccionnan economico ta mustra cu Aruba su economia lo conoce un crecemento bon atrobe, locual ta nifica cu SVb ta spera aumento den entrada di nan fondonan.
Na mesun momento, el a resalta cu for di experencia nan sa cu ora economia ta draai bon, dianan di AO tin tendencia di stabilisa, por lo tanto nan expectativa ta cu e fondonan di malesa y accidente lo conoce un resultado positivo.
Pa cu cesantia el a indica cu nan ta spera cu e cantidad di companianan cu ta bay bancarota lo ta abao y por lo tanto den e fondo di cesantia tambe ta spera cu lo tin un resultado positivo
Pa loke ta e fondo di pensioen, Jacobs a indica cu na 2024 e edad di pensioen a alcansa 65 aña y no ta aumenta mas. El a splica cu e impacto cu nan lo mira ta cu lo nota un crecemento grandi den e cantidad di pensionadonan e aña aki y por lo tanto un aumento den e gastonan. El a agrega cu a pesar di esaki, e ta spera cu e fondo cera cu un surplus atrobe.
“Pues, e expectativa pa SVb pa 2025 ta uno positivo, uno di consolidacion preparando e fondonan pa desaroyonan den futuro,” el a subraya.
