Suzette Wernet-Besselink ta traha den e departamento di administratie na Maria College Mavo y otro aña e lo ta celebrando 25 aña di servicio na Maria College Mavo. Suzette ta un persona alegre y hopi activo y aworaki e ta preparando pa representa su scol den eleccion di Sra. Carnaval di Carnaval 70.
Suzette ta conta cu otro aña, den luna di augustus e lo ta cumpliendo 25 aña di servicio na Maria College Mavo, scol cu el a bishita tambe tempo e tabata mas jong. El a sigui conta cu despues di basisschool el a bishita Maria College Mavo mes, el a studia kantoor opleiding y cu apenas 19 aña di dead el a cuminsa traha na Maria College mes.
Aworaki Suzette ta preparando pa bay pa señora Carnaval representando Maria College y Empire Carnival Group.
El a splica cu e idea pa e participa den e eleccion di carnaval a bin door di su coleganan mes. E aña aki Maria College tabatin e parada escolar cu e muchanan, despues di hopi aña nan a bolbe haci’e cual tabata hopi great, y e idea a bin pasobra cada klas a saca un reina y e ora e coleganan a dicidi cu den e coleganan mes tambe nan mester manda un señora carnaval y nan kies Suzette. “Ami ta gusta y mi a bay pe,” el a bisa.
Suzette ta describi su mes como un persona alegre cu gusta baila y ademas di esaki e tin su propio fit team na cual e ta duna les fit dance. “Mi ta hopi activo den e parti di fitness. Mi ta haci desafionan cu mi team pa baha peso y diferente otro actividad. Otro aña mi ta haci cinco aña cu mi team cu yama Get Fit and Dance with Suzette,” el a agrega.
Pa loke ta e preparacionnan pa eleccion di Señora Carnaval, Suzette ta conta cu e preparacionnan ta bayendo super bon. Na januari el wordo corona door di Maria College y e muchanan di scol, pero dia 23 di augustus el a wordo corona oficialmente como representante di Maria College Mavo y Empire Carnival Group, y desde e dia ey e preparacionnan a cuminsa serio.
Como un persona activo, Suzette su mensahe pa tur otro persona ta pa “semper gosa bida cu un smile na bo cara, cu actitud positivo y cu Dios bo dilanti. Pa fitness no tin edad. Ami mes tin un señora di 74 aña cu ta baila cu nos, mi ta hopi orguyoso di dje y esey ta demostra cu pa haci actividad no tin edad, semper salud ta na prome luga,” el a finalisa.
