ORANJESTAD – Pa loke ta e maneho di cobamento di santo y kibramento di piedra, Gobierno a sa di atende cu e preocupacion aki treci dilanti na diferente ocasion, pa entre otro e fundacion Salba Sero Cristal, na serio. Ya pa casi 1 aña caba Gobierno ta atendiendo cu e situacion ak,i cu ta un problema pa entre 20 cu 30 aña caba.

Den e caso specifico di Sero Cristal / Babijn y e area aki, Oduber durante un conferencia di prensa a splica cu na diferente ocasion a atende cu esunnan cu ta eherce nan ofishi den e area aki. Ta papia di specificamente 3 compania: Best International Group, Cala Romana y Caribbean Beton. Cu ta e companianan principal cu tabata opera den e area, sea ta cobando santo, kibrando piedra of trahando bloki.

Oduber a splica cu desde aña pasa (2018) a notifica e gruponan aki cu e trabounan aki no ta cuadra cu e maneho di Gobierno, y tampoco cu e Landsverordening Ruimtelijke Ontwikkeling (LRO). A traves di e ROP ta determina cu e area specifico aki ta un area di naturalesa conserva y preserva. Despues di hopi aña di no a atende riba e hindervergunning, Oduber a mustra e diferente gruponan cu nan no lo ricibi hindervergunning pa sigui traha den e areanan aki. Banda di esaki, na december 2018 a anuncia y notifica e companianan di un overgangsfase di dos aña pa loke ta cobamento di tera. Pues ta papia 1 januari 2021 cu Gobierno no lo permiti pa e cobamentonan aki sigui tuma luga pa diferente motibo, primordialmente pasobra varios di esakinan ta contra ley y sa di e daño cu e buraconan aki ta causa. Otro motibonan ta e aspecto di salubridad y siguridad.

Adicionalmente, na december tambe a anuncia e decision pa loke ta e ‘voorbereidingsbesluit’ cual ta inclui cu personanan cu ta haci uzo di terenonan di mas di 750 meter cuadra, mester haci peticion pa ‘aanleg vergunning’. Mester bisa cu gruponan cu ta coba manera Cala Romana, Best International Group y Caribbean Beton mester a haci peticion pa esaki. E peticionnan a wordo haci y recientemente a nenga e peticion aki di Cala Romana. Esaki ta significa cu operacion di Cala Romana ta bira imposibel, mirando cu nan no tin hindervergunning tampoco. Consecuentemente nan mester para tur actividad.

Bureau City Inspector, DNM, DIP lo percura pa control severo tuma luga, pa evita cu esaki ta continua. Importante pa accentua ta cu Gobierno a ofrece alternativa di operacion na otro sitio, manera na Barcadera, cu ta designa como area industrial, na e otro companianan y tambe Cala Romana. Sinembargo, te cu e ultimo reunion entre DIP y Cala Romana siman pasa, no por a identifica nan intencionnan, cual ta e motibo cu a tuma un decision definitivo den esaki. Den caso cu mira actividadnan tuma luga, lo implementa boet inmediatamente hunto cu Cuerpo Policial. Di e forma aki a tuma e decision pa para algo cu ya caba for di basta tempo tabata hopi tolerante cune.

Pa loke ta trata e otro dos companianan, Best International Group a para tur nan actividad na Babijn y ta haciendo nan operacion na otro sitionan cu si tin permisonan necesario pa haci esaki, pa cual ta gradici e compania cu tabata un di e prome pa tuma e paso aki. Actualmente ta den contacto cu DIP, cu a ofrece nan tereno na Barcadera den caso cu nan kier sigui den e industria di importacion. Pa loke ta Caribbean Beton, a duna tur sosten tambe desde prome momento cu a acerca nan. E siman aki ta mudando tur nan ekiponan, (esaki a duro un poco mas tempo cu nan a premira). Luna pasa tabata e deadline pa finalisa mudansa, sinembargo a confirma cu full e planta di traha beton a wordo muda pa Barcadera, y e siman aki nan ta caba di muda otro materialnan.

Otro sitionan cu ta coba

Pa loke ta trabounan similar tumando luga na otro sitionan rond aruba cu no ta cay den area destina pa naturalesa, pero cu ta terenonan propio, nan mester a pidi un aanleg vergunning. E companianan lo ricibi nan contesta y lo notifica/recorda nan di e fase transitorio di dos aña. Conhuntamente cu limitacion y condicionnan den cual nan por sigui coba/ opera.

Pa conclui, Oduber a bisa cu no tabata facil pa Gobierno atende cu e situacion aki, cu ta encera actividadnan cu tabata tuma luga pa hopi tempo, pa cual tempo, fase transitorio y alternativa tabata aspectonan hopi importante pa yega na e punto aki. Pasobra no por para operacion di un compania di un dia pa otro. Gabinete Wever-Croes a pone dilanti cu medio ambiente ta un prioridad, y e balansa pa loke ta trata cuido di nos medio ambiente y flora y fauna ta importante, y por mira esaki den e pasonan cu ta tuma.