Tiramento sushi (1).JPG
Segun Bureau City Inspector, pa motibo cu hopi hende ta tira sushi den mondi, ora cu awasero a cay e biaha aki el a stroba e fluho di awa den rooinan como tambe treciendo sushi den cura di hende.
 
“Alaska ta leu, luna ta leu y solo ta mas leu ainda. Dump no ta leu! Bo por yega dump un manera of otro pa bo tira bo sushinan afo sin necesidad di tira esaki den mondi”, asina Marlon Pieters di Bureau City Inspector ta comenta. Segun Bureau City Inspector, nan a ripara cu no ta tur, pero ta basta hende ta floho pa bay tira sushi afo caminda mester ta of yama un compania pa haci e pa nan. Pa hopi hende, e ta mas facil pa tira nan sushi patras di nan cura of pone den baki di pickup pa sali cu e intencion di bay dump cu ne, anto na caminda drenta un mondi y tir’e eyden. Den varios inspeccion cu Bureau City Inspector a haci rond Aruba specialmente den e areanan mas afecta despues di e awasero torencial di siman pasa, a constata cu sushi a hunga un rol den tapa algun riool y stroba e fluho di awa.
 
Mester ta mas consciente
Ta un solo dump so tin na Aruba cual ta Parkietenbos, sin embargo segun Danilo Prescott di Bureau City Inspector, semper bo ta haya hende cu ainda tin e custumber pa yega tira sushi unda cu ta. “Nos trabao ta mas pa observa, si nos gara nan den e acto hunto cu coleganan di polis, nos ta traha un multa pa nan anto presenta dilanti hues,” Sr. Prescott ta splica. Bureau City Inspector no ta pone e costo di e multa, esaki ta cay bao responsabilidad di Ministerio Publico.
Siman pasa ciudadanonan a confronta un  señora cu a tira sushi riba caminda publico anto esaki a keda den boca di pueblo pa basta dia. “Esnan cu a atende e señora aki mi ta kere a haci bon pero tambe nan tabata poco grosero pa hinca e sushi den e señora su cara. Nos ni polis no ta haci esey,” Sr. Prescott ta bisa.
 
St. Cruz ta bario di mas limpi
Segun Sr. Prescott, e ta haya cu e bario di St. Cruz ta esun di mas limpi cu tin anto e areanan mas afecta di sushedad riba e isla ta varia. “Na tur mondinan, no papia mes di mondi. For di San Nicolas te na West Punt, centro di Oranjestad. Bo ta haya sushi dos pa tres meter leu for di dump di hendenan cu kisas ta pensa cu ya, dump a cera pues nan no ta bay cu e sushi bek cas of algun otro motibo. E ta tur caminda,” Sr. Prescott. Colega di Sr. Prescott, esta Sr. Anthony Gario, ta trahando riba un proyecto for di basta tempo caba caminda ta bay cuminsa pone borchi na diferente partinan di Aruba. Lo monitor e borchinan aki anto segun Sr. Prescott, e chens cu bo ta wordo gara ta grandi. Sr. Prescott ta bisa: “Si tur cos ta bon e proyecto aki lo keda cla pronto, e ta basta grandi conhuntamente cu instancianan manera DOW, FCCA y Serlimar djis pa nombra algun.”
 
Preparacion pa dianan di fiesta
Pa dianan di fiesta, Bureau City Inspector semper tin nan man yen. E dianan di fiesta nos dilanti, nan lo ta mas consciente riba e areanan vulnerabel. Camindanan cu candela por start hopi facil pa motibo di tiramento di klapchi den areanan cu tin sushi. Den Caya Betico por ehempel, controla e klapchinan cu ta cay unda e tram ta core pa evita accidente y hopi otro cos mas cu Bureau City Inspector ta bay tene na cuenta.