Ayera nochi den cayanan di San Nicolas a tuma luga e Parada di Luz di San Nicolas. Un total di nuebe grupo a participa den e parada. Despues di parada algo cu a sobresali y cu varios persona a comenta riba dje ariba rednan social ta e hecho cu a keda hopi sushi atras, specificamente sushi di slinger plata cu tabata parti di e vestuario di un di e gruponan.
Un di e gruponan mas popular y grandi di carnaval, esta Champagne Carnival Group, tabata topico di discusion ariba rednan social pa motibo cu nan trahenan di parada di luz na San Nicolas a laga sushedad grandi ariba e cayanan di San Nicolas despues di e parada.
E trahe di e participantenan di e grupo tabata consisti di jacket cu slingers di plastic color silver pega na dje. E slingernan aki lamentablemente tabata los durante parada y hopi di slingernan aki a keda riba caya causando sushedad.
E slingernan aki tabata pega den e matanan y yerba banda di caminda cual tabata haci’e un poco mas duro di kita. Apart di esey nan ta bula facil cu biento cual tambe ta haci dificil cu por piki nan. Pa e motibo aki trahadonan di Serlimar mester a traha extra pa por recoge e sushedad aki cu a keda atras.
Usuarionan ariba red social a vocifera nan malcontento pa e situacion aki y tabata pidi pa e grupo di carnaval cu a causa e sushedad bin pa dilanti y haci algo al respecto.
A traves di un publicacion ariba nan pagina di Facebook, Champagne Carnival Group a ofrece un disculpa publico pa a causa tanto sushedad y a enfatisa cu esey no tabata nan intencion.
“Na Nomber di Lienchie y Champagne Carnival Group cu tin mas di 25 aña ta aporta na Aruba su carnaval nos kier a pidi nos disculpa na comunidad di San Nicolas, pero tambe Aruba cu ta stima su medio ambiente. Y claro na nos participantenan cu ta engrandece Champagne Carnival Group tur aña. Como team creativo nos meta tabata pa trece un bes mas algo innovativo (cu no ta t-shirt) riba caya pa asina mirones disfruta y nos participantenan briya manera Champagne so por. Obviamente nos no por a premira cu e trahenan aki lo a yena cayanan di San Nicolas cu tanto sushedad sino claramente no lo a cumpra nan. Nos a tuma contacto cu Serlimar di biaha manera a tuma nota di e sushedad pa asina nos cayanan di San Nicolas ta limpi back,” e publicacion a indica.
