(NLTimes) – Suriname lo ricibi 700mil vacuna di Covid-19 den futuro, segun Volkskrant a anuncia ayera.
Suriname a solicita vacuna for di gobierno na Den Haag varios siman atras, pa yuda e pais Sur Americano den e lucha contra coroanvirus. Minister di Salud di Suriname, Amar Ramadhin, a bisa cu gobierno Hulandes no a reacciona na nan peticion durante dos siman.
Siman pasa, apelacion di Ramadhin a keda trata den Tweede Kamer. Minister Hulandes di Salud, Hugo de Jonge, a bisa e tempo ey cu e lo drenta den negociacion cu Suriname tocante e posibilidad di asistencia den forma di vacuna di Covid-19.
Presidente di Suriname, Chan Santokhi a bisa den un discurso diahuebs cu Hulanda lo manda suficiente dosis pa vacuna ‘henter e poblacion’ di alrededor di 650mil persona. Gobierno Hulandes ainda no a confirma e cantidad concreto.
Embahador di Suriname, Rajendre Khargi, lo discuti cu oficialnan Hulandes e siman aki cuanto dosis exactamente e pais Sur Americano lo ricibi. Ta probabel cu Suriname lo ricibi 700mil dosis, maske ainda no ta hopi cla di cua compania e vacunanan aki lo bin.
Tambe tin bon probabilidad cu Hulanda tambe lo duna Suriname sosten logistico, manera frishider pa almacena e vacunanan.
Suriname ta luchando cu un escasez di personal medico durante e pandemia. Pa motibo di falta di enfermeronan, tres hospital Surnameño mester a cera nan ICU pa baby recien naci. Esaki particularmente a pone den riesgo e bida di baby enfermo y prematuro.
