Presidente Desi Bouterse di Suriname a bolbe na su pais diadomingo marduga, despues di un bishita oficial na China. Tabata sperando su yegada un multitud di alrededor 1.500 simpatisante, cu a bin topa cu nan lider, di 74 aña, pa dun’e apoyo contra e veredicto di e Corte Militar, cu diabierna pasa a yega na un sentencia di 20 aña di prison pa e presidente, pa su responsabilidad den e asesinato na december 1982 di 15 lider prominente di oposicion politico y sindical.
A keda segun e corte comproba cu Bouterse como maximo lider militar mes a dirigi e operacion, den cual a aresta, tortura y mata e 15 personanan.
E simpatisantenan di Bouterse a ricibi e presidente cu canto y bandera. Partido Nacional Democrata (NDP) di Bouterse a haci un yamado na su simpatisantenan pa bay aeropuerto y a charter como setenta bus pa transporta tur hende.
Na su yegada Bouterse a duna un rueda di prensa den cual el a duna un prome reaccion riba e condena, ridiculisando esaki como un “tik-tak politiek spel.” “E ta bay manera ta hunga e wega, basta nos keda dentro di derecho y ley,” el a bisa. “E wega politico ta ser hunga asina abiertamente, cu tabata cla di antemano cu esaki lo a bin,” segun Bouterse, cu a priminti un contesta “politico” pa e cuestion aki.
Diabierna pasa di repente e Corte Militar di Suriname a cuminsa cu lesa e sentencianan den e proceso encuanto e asesinatonan di december 1982. E Corte ta considera cu tabatin proposito y premeditacion di parti di e presidente, e tempo aya lider di e hunta militar cu tabata goberna e pais despues di un golpi di estado. E condena tabata di binti aña di prison. Pero e Corte no a exigi su aresto inmediato.
Bouterse ta bay den apelacion contra e sentencia. E presidente semper a nenga su envolvimento den e suceso. E lo mester bay prison despues di un condena den apelacion.
