Inmediatamente despues di e rechaso Venezolano di e decision di Nacionnan Uni pa manda e conflicto di frontera cu Guyana pa corte internacional di husticia na Den Haag, e vice canciyer di Venezuela Alexander Gabriel Yanez a anuncia riba Twittercu el a yega na capital di Surinam, diahuebs pasa, pa papia cu ministro di asunto exterior di e pais, Ylidz Pollack-Beighle.
E reunion a tuma luga na sede di e ministerio di asunto exterior na Paramaribo, unda Venezuela y Surinam a fortalece nan lasonan di amistad y cooperacion bilateral, Yanez a bisa riba Twitter. E obhetivo di e reunion tabata tambe pa continua cooperacion den proyectonan entre Venezuela and Surinam.
E diplomatico Venezolano a topa tambe cu e secretario permanente pa asunto geopolitico di Surinam, Michel Raafenberg, unda a atende topico di interes y cooperacion mutuo.
“Venezuela y Surinam ta mantene relacion di amistad, solidaridad y cooperacion a base di respet y igualdad di e estadonan. Danki na yegada di e Revolucion Bolivariano, mecaniconan regional manera PetroCaribe y ALBA a desaroya, cu a permiti e complementariedad y beneficionan pa e pueblonan di e region”, Caracas a declara.
“Na augustus 2017 e presidente di Surinam, Desiré Bouterse, a bishita e patria di Bolivar, unda el a reuni cu ministro di asunto exterior, Jorge Arreaza, y a expresa su apoyo pa pueblo y gobierno di Venezuela en bista di e menasa y atakenan di e imperio di Estadonan Uni”, segun e recado di prensa di Caracas.
Mientras tanto, e controversia di mas di un siglo entre Guyana y Venezuela a wordo manda pa secretario general di Nacionnan Uni pa corte internacional di husticia na Den Haag. Mientras Caracas a rechasa e decision aki, Guyana lo procede cu e caso na Den Haag y no mester di consentimento di Venezuela pa haci esaki. Segun Guyana, cu firmamento di e convenio di Ginebra na 1966, Venezuela a pasa e asunto pa Nacionnan Uni y por lo tanto a bay di acuerdo cu e secretario general por manda e caso pa corte internacional.
Surinam, cu tambe ta reclama parti di Guyana, te awor a keda keto riba e decision di Nacionnan Uni pa manda e caso di e conflicto entre Guyana y Venezuela pa e corte. Guyana a hiba Surinam na e mesun corte aki den un conflicto tocante e limitenan maritimo entre e paisnan y a logra cu e corte a dicta na fabor di Guyana. Ta parce cu Venezuela ta busca apoyo di Surinam den e asunto aki. Esey lo no ta algo facil, ya cu Surinam ta tambe miembro pleno di Caribbean Community (CARICOM), cu a expresa su apoyo na e posicion di Guyana den e disputa cu Venezuela.
