Caribbean Development Bank (CDB) a aproba un prestamo di US$30 miyon na gobierno di Surinam, pa reemplasa e luznan di caya actual, cu ta di sodium high pressure pa sistema di LED. E reemplaso di e aproximadamente 40.000 luznan di caya mester reduci consumo di energia y costo, como tambe limita emision dañino pa medio ambiente.
“Iluminacion di caya ta un gasto substancial pa gobierno di Surinam, cu ta encera como 30% di e consumo total di electricidad. E proyecto lo mester reduci considerablemente consumo di electricidad y emision, cu un reduccion corespondiente den gasto. E introduccion di iluminacion di caya eficiente den energia y di tecnologia inteligente ta contribui na vision di gobierno pa establece un suministro di energia moderno, sostenibel y pagabel, conduciendo na siguridad energetico y competitividad internacional”, Daniel Best, director di e proyecto na CDB, ta bisa.
E proyecto lo ser ehecuta pa compania di utilidad Energie Bedrijven Suriname (EBS). E lo inclui e instalacion di un sistema di midi avansa, incluyendo e instalacion di 21.000 meter di electricidad inteligente. Esaki lo mehora EBS su eficiencia operacional, como cu e meternan inteligente lo mehora e confiabilidad di e registracion di consumo, y facilita diagnostico for di distancia, reduciendo e tempo pa responde den caso di fayo.
Lo tin tambe un componente di screening di riesgo di clima, loke ta inclui un evaluacion di e vulnerabilidad di EBS su infrastructura di suministro, y recomendacion pa aumenta su capacidad di responde.
E prestamo di CDB ta inclui US$18.6 miyon di European Investment Bank Climate Action Line of Credit (CALC) cerca CDB. Fondo adicional di US$3.4 miyon lo bin di EBS mes.
E proyecto ta di acuerdo cu e compromiso di CDB cu cambio di clima y energia sostenibel, manera elabora den su plan strategico 2015-2019. E ta consistente tambe cu CDB su obhetivo strategico pa apoya crecemento y desaroyo y sostenibel, y su prioridad cooperativo di fortifica y modernisa infrastructura social y economico.
