(AP) — Ansioso tocante e lansamento inminente di awa di desperdicio nuclear trata for di e planta nuclear Fukushima daña pa tsunami, centenares di Sur Koreano a marcha na nan capital riba diasabra. Manifestantenan a haci un yamado pa Tokyo bandona e plan y a expresa rabia pa Seoul pa sostene e descara a pesar di supuesto riesgo pa seguridad di cuminda.
E manifestacion diasabra tabata esun mas recien den un siman di protesta desde cu Agencia Internacional di Energia Atomico (IAEA) a aproba e plan di descarga Hapones na juli, bisando cu e proceso lo cumpli cu standardnan internacional di seguridad y presenta impacto negligible pa ambiente y salud.
E seguridad di e plannan pa basha awa di desperdicio tambe ta sosteni pa gobierno di presidente Sur Koreano, Yoon Suk Yeol, kende den lunanan recien activamente a tuma stapnan pa repara lasonan tenso cu su aliado Mericano enfrentando e menasa nuclear cresciente di Nort Korea.
Gobierno Hapones a bisa cu e lansamento di awa di desperdicio ta programa pa cuminsa e berano aki, pero no a confirma un fecha specifico. Bistiendo regenjas y cu borchinan bisando “nos ta opone e bashamento di awa contamina di Fukushima” y “ningun material radioactivo ta safe pa lama,” e manifestantenan a marcha den yobida leve door di e cayanan di Seoul. E manifestacionnan tabata andando pacificamente y no tabatin reportahe inmediato di enfrentamento of heridonan.
Sur Korea ta purbando di calma e miedo di hende di contaminacion di cuminda y riesgonan ambiental prome cu e lansamento di e awa di Fukushima, incluyendo door di expande test di radiacion riba cuminda di lama na e mercadonan di pisca mas grandi di e pais, y hasta haciendo test di santo for di su beachnan sur y west. Ningun di e test te awo a genera preocupacion pa seguridad, segun Jeon Jae-woo, un oficial di ministerio di Ocean y Pesca a bisa durante un sesion di informacion diabierna.
Park Ku-yeon, prome vice-minister di Oficina pa Coordinacion di Politica di Gobierno, a bisa cu Sur Korea tabatin speransa pa completa consultanan na nivel administrativo cu Hapon proximo siman tocante si ta permiti expertonan Sur Koreano pa participa den e monitoreo di e proceso di lansamento di awa.
Legisladornan liberal di oposicion controlando e Asamblea Nacional di e pais a acusa gobierno di Yoon di pone salud di hende den riesgo mientras ta purba mehora lasonan bilateral.
E Partido Democrata a bisa siman pasa cu tin plan pa entrega un keho cerca e Conseho di Derechonan Humano di Nacionnan Uni pa resalta loke ta bisa ta e riesgonan presenta pa e bashamento di awa di Fukushima, y e pregunta si IAEA a revisa adecuadamente e riesgonan prome cu aproba e plan di descarga.
E partido tambe a urgi Yoon pa reverti su posicion y usa un cumbre trilateral e luna aki cu prome minister Hapones, Fumio Kishida y presidente Mericano, Joe Biden pa declara oposicion di Seoul pa e lansamento di e awa.
