(AP) — Un homber kende a habri un porta di emergencia durante un vuelo na Sur Korea a keda aresta formalmente ayera y ta enfrenta hasta 10 aña di prison pa un cargo di viola ley di seguridad di aviacion, oficialnan a bisa.
Durante interogacion preliminar, e homber di 33 aña a bisa investigadornan cu el a sinti su mes sofoca y a purba di sali for di e avion rapidamente, segun polis.
Diesdos persona a resulta levemente herida riba diabierna despues cu el a habri e porta di e Airbus A321-200 di Asiana Airlines, causando cu aire a drenta e cabina spantando e pasaheronan. Algun a testigua cu nan a sufri dolor severo di horea y a mira otronan grita y yora. Un video comparti riba rednan social ta mustra con cabey di e pasaheronan tabata bula pa e aire cu a drenta e cabina.
Normalmente, no por habri porta di emergencia durante un vuelo pa motibo di e diferencia den presion di aire paden y pafo di e avion. Pero durante e incidente diabierna, e homber a logra habri e porta probablemente pasobra e avion tabata bulando na un haltura abao mientras tabata prepara pa aterisa y no tabatin hopi diferencia den presion, segun oficialnan di Asiana Airlines.
Ministerio di Transporte a bisa cu e avion tabata na 213 meter di haltura na momento cu e homber a habri e porta. E avion tabata preparando pa aterisa na Daegu despues di un vuelo di un ora for di e isla di Jeju cu 200 hende abordo. Nan tabata inclui atletanan adolescente na caminda pa un competencia di track and field, segun Asiana Airlines.
Diadomingo, un corte di districto na Daegu a aproba un orden pa formalmente aresta e homber. Polis anteriormente a busca e orden di aresto citando e gravedad di e crimen y e posibilidad cu e homber por huy, segun polis di Daegu.
“Mi tabata kier baha for di e avion pronto,” segun e homber, kende su cara tabata tapa pa un hoodie preto, pechi y mask, a bisa reporteronan na e corte prome cu su audiencia pa su orden di aresto. “Mi ta hopi sorry cu e muchanan,” el a bisa probablemente referiendo na e atletanan adolescente.
Polis di Daegu a bisa cu nan tin hasta 20 dia pa investiga e homber prome cu determina si ta mand’e na fiscalnan pa un posible enhuiciamento.
Si e keda condena, e ta enfrenta un sentencia maximo di 10 aña di prison pa viola e ley di seguridad di aviacion cu ta prohibi pasaheronan di usa porta di entrada, salida di emergencia y otro ekipo abordo, segun Ministerio di Transporte.
Polis di Daegu a bisa cu e homber, di fam Lee, a bisa nan cu e tabatin stress despues di recientemente perde su trabao y cu e kier a sali di e avion rapidamente pasobra e tabata sinti su mes sofoca tiki prome cu aterisahe.
E hendenan cu a keda transporta pa hospital a ricibi tratamento principalmente pa problemanan menor manera dificultad pa hala rosea.
Asiana Airlines a bisa den un declaracion cu cuminsando ayera, a stop benta di asiento riba salida di emergencia riba su avionnan A321-200 di 174 asiento, y e A321-200s di 195 asiento como un precaucion pa seguridad. Lee tabata sinta cerca di e salida di emergencia, oficialnan di e aerolinea a bisa.
