(AP) – Sur Korea a anuncia dialuna cu lo suspende un trato cu Nort Korea pa castiga e pais a causa di su lansamento di blaasnan cargando sushi, hasta despues cu Nort Korea a bisa cu nan lo para nan campaña di blaas.
Durante varios dia. Nort Korea a lansa centenares di blaas cu sushi na Sur Korea como parti di un reaccion na campañanan di ciudadanonan Sur Koreano. Riba diadomingo, Sur Korea a bisa cu nan lo tuma “accion insoportabel” como su respuesta, prome cu Nort Korea a anuncia cu nan lo stop di manda blaas na e frontera.
Riba dialuna, Sur Korea su conseho di seguridad nacional presidencial a bisa cu nan a dicidi di suspende un acuerdo inter-Koreano di aña 2018 cu tin e meta di alivia enemistad, te ora cu e confiansa mutuo entre e dos Koreanan keda restaura, segun e oficina presidencial.
E conseho di seguridad a bisa cu e suspension lo permiti Sur Korea sigui cu simulacronan militar na e frontera cu Nort Korea y ehecuta respuestanan efectivo y inmediato na provocacionnan di Nort Korea. El a bisa cu un proposicion pa e suspension lo keda introduci na e Conseho di Gabinete riba diamars pa aprobacion.
Observadornan ta bisa cu Sur Korea tin mester di e suspension di e trato pa bolbe cuminsa pasa propaganda anti-Pyongyang, canticanan di K-pop y noticia na e frontera cu speaker. Nan ta bisa cu e tipo di accion aki anteriormente a molesta e pais cu control estricto, unda su casi 26 miyon persona no ta permiti tin acceso oficial na noticia di exterior.
E acuerdo di ana 2018, cual a ser yega durante un periodo breve di reconciliacion entre e president Sur Koreano Moon Jae In di e tempo ey y e lider Nort Koreano Kim Jong Un, ta rekeri e Koreanan para tur acto hostil contra otro, incluyendo campañanan di parti flyer y broadcast.
Sinembargo e acuerdo no ta claramente specifica cu e ciudadanonan no por plania esaki. Esaki a permiti e activistanan di Sur Korea sigui manda blaas cu flyer anti-Pyongyang, SB cu programanan di Sur Korea y noticia internacional ademas di dollar Mericano na Nort Korea. Disgusta a causa di e campañanan aki, Nort Korea a dispara e blaasnan drentando y a destrui un oficina crea pa Sur Korea pa trata asuntonan inter-Koreano na Nort Korea.
E trato ya caba tabata den peliger di collapse. Tension a aumenta despues cu Nort Korea a lansa satelite den november, cual a provoca cu ambos Korea a tuma paso den violacion di e trato, Sur Korea cuminsando bek su vigilancia aereo y Nort Korea restaurando e posicion di guardianan na e frontera.
Desde diamars ultimo, un total di 1,000 blaas Nort Koreano cargando pupu, sigaria, paña kibra y otro tiponan di sushi a ser descubri den varios parti di Sur Korea. No a haya ningun substancia dañino segun Sur Korea su ehercito.
Riba diadomingo anochi, Kimg Kang Il, Nort Korea su vice minister di defensa a bisa cu e pais lo stop e campaña pa motibo cu nan ta sinti cu Sur Koreanonan a “experiencia lo suficiente con desagradabel nan a sinti.” El a bisa cu Nort Korea lo cuminsa e campaña back si e activistanan di Sur Korea bolbe cuminsa cu nan actividadnan di blaas.
Expertonan ta bisa cu Nort Korea su campaña, aparentemente e prome di su tipo den 7 aña, tin e meta di causa un division na Sur Korea a causa di su gobierno conservativo actual su politica estricto contra Nort Korea. Desde 2022, Nort Korea a dramaticamente aumenta su testnan di arma den loke analistanan ta yama un intento di mehora su capacidad nuclear y aumenta su peso den relacionnan diplomatico den futuro cu Merca.
