(AP) — Sur Korea ayera a lansa su prome satelite militar spion, un tiki mas cu un siman despues cu Nort Korea a bisa cu a pone su prome satelite spion den orbita pa prome biaha, mientras tension ta aumenta entre e rivalnan.
Lansa for di e Base di Forsa Espacial Vandenberg na California usando un raket Falcon 9 di SpaceX, e tabata e prome di cinco satelite spion cu Sur Korea tin plan pa manda den espacio pa 2025 bao un contract cu SpaceX. E evento tabata programa pa inicio di e siman aki pero a keda retrasa pa motibo di clima.
Sur Korea no tin satelite di reconnaissance militar di su mes den espacio, y parcialmente a depende riba satelitenan spion Mericano pa monitor accionnan di Nort Korea.
Operando hunto cu e asina-yama sistema di tres axis Sur Koreano – atake preventivo, defensa di misil y
Activo di represalia – expertonan ta bisa cu satelite spion ta bay reforsa significantemente e defensa di e pais contra Nort Korea.
Despues di dos lansamento fracasa e aña aki, Nort Korea a bisa cu exitosamente a pone su satelite spion “Malligyong-1” den orbita siman pasa. Sur Korea a confirma cu e satelite a drenta den orbita, pero oficialnan a bisa cu nan mester mas tempo pa verifica cu e ta traha adecuadamente.
Nort Korea a bisa diamars cu lider Kim Jong Un a mira imagen saca pa e satelite Malligyong-1 di Cas Blanco y Pentagono na Washington y carriernan di avion Mericano na un base naval y un shipyard na Virginia. Nort Korea a bisa anteriormente cu e satelite tambe a transmiti potret di facilidadnan militar Mericano na Guam y Hawaii, y sitionan clave na Sur Korea.
E lansamento di satelite Nort Koreano a genera condena fuerte inmediato for di Merca, Sur Korea y otronan. Varios resolucion di Conseho di Seguridad di ONU ta prohibi lansamento di satelite di Nort Korea, considerandonan como cobertura pa test su tecnologia di misil di distancia largo.
Nort Korea a responde rabia, bisando cu tin derecho soberano pa lansa satelite spion pa maneha loke ta yama e aumento den hostilidad Mericano. A bisa cu lo lansa satelite adicional.
E lansamento di satelitenan a inflama animosidad entre e Koreanan rival, y ambos nacion a tuma stap pa viola un acuerdo militar anterior cu tabatin intencion di alivia tension militar den prome linea.
Satelite spion ta entre e sistemanan di arma di alto tecnologia cu Kim a priminti publicamente cu lo introduci. Desde aña pasa, Nort Korea a conduci como 100 test di misil balistico, parti di su esfuersonan pa modernisa su arsenal di arma enfoca contra Sur Korea y Merca.
Den respuesta, Sur Korea y Merca a expande nan training militar ya reforsa “visibilidad regular” di activonan strategico Mericano, incluyendo aircraft carrier, bomber cu capacidad nuclear, y un submarino arma nuclear den Peninsula Koreano.
Agencia di spionahe Sur Koreano a bisa legisladornan siman pasa cu asistencia tecnologico di Rusia probablemente a habilita Nort Korea pa pone su satelite spion den orbita. Sur Korea, Merca y Hapon a acusa Nort Korea di busca tecnologianan high-tech for di Rusia necesario pa reforsa su programanan militar a cambio di suministra armanan convecnional pa sostene e guera di Rusia na Ucrania. Tanto Rusia como Nort Korea a rechasa e acusacionnan.
