(AP) — Rusia a suministra sistemanan di misil di defensa aereo na Nort Korea a cambio di manda trupa pa sostene e esfuerso di guera Ruso contra Ucrania, un oficial top Sur Koreano a bisa ayera.
Merca, Sur Korea y Ucrania ta bisa cu Nort Korea a manda mas di mil trupa pa Rusia na october, algun di cual recientemente a cuminsa participa den combate den lineanan frontal. Despliegue di trupa Nort Koreano ta menasa di escala e guera, y loke Rusia por duna e Nort a cambio ta un fuente di speculacion internacional rampante.
E desaroyo mas alarmante pa Sur Korea y Merca lo ta si Rusia transferi tecnologia sofistica di arma cu por reforsa e misilnan Nort Koreano cu capacidad nuclear enfoca riba su rivalnan. Hopi experto ta bisa, sinembargo, cu ta poco probable cu Rusia lo haci esaki den e etapa inicial di e despliegue di trupa di e Nort.
Shin Wonshik, consehero di seguridad nacional pa presidente Sur Koreano, Yoom Suk Yeol, a bisa programa di television di SBS ayera cu Sur Korea a haya cu Rusia a duna misil y otro ekipo pa yuda reforsa su red di defensa aereo pa Pyongyang, e capital. Shin no a bisa specificamente ki misil Rusia a duna Nort Korea.
Lee Illwoo, une xperto cu Red di Defensa Koreano na Sur Korea, a bisa cu Rusia probablemente a manda misilnan S-400 di rango largo superficie-pa-aire, launcher y sistema di radar basa riba suelo. El a bisa cu Nort Korea ta capaz di construi misilnan di rango mas cortico superficie-pa-aire riba su mes.
E misil S-400, cu un rango di 400 kilometer, ta considera un di e armanan anti-avion mas avansa di Rusia. Pero Lee a cuestiona con significantemente por reforsa defensa aereo di Pyongyang, bisando cu sistemanan di defensa aereo Ruso a fracasa pa deal efectivamente cu atake di drone Ucraniano.
Hopi observador ta bisa cu Nort Korea probablemente a sinti e necesidad urgente di reforsa su capacidad di defensa aereo despues cu luna pasa a acusa Sur Korea di bula drone pa tira papel cu propaganda riba Pyongyang. Nort Korea a menasa di tuma accion militar si bolbe tira papel. Ehercito Sur Koreano a nenga di confirma si tabata tras di e supuesto dronennan of no.
Kim Dae Young, experto militar di Instituto Koreano di Investigacion pa Strategia Nacional, a bisa cu ta posible cu e sistemanan di defensa aereo cu Nort Korea a adkiri for di Rusia por inclui ekipo anti-drone. Kim a bisa cu e sistema di defensa aereo anticua di Pyongyang lo mester añas di mehoracion y potencialmente ayudo externo enorme pa por maneha e forsa aereo superior di Sur Korea y Merca.
Shin a bisa cu Rusia tambe ta parce di a duna asistencia economico na Nort Korea y varios tecnologia militar, incluyendo esnan necesario pa e esfuersonan di e Nort pa construi un sistema confiable di spionahe basa na espacio. Shin no a bisa si Rusia ya a transferi tecnologia nuclear y misil sensitivo na Nort Korea.
Durante un cumbre cu lider Nort Koreano, Kim Jong Un aña pasa, presidente Ruso, Vladimir Putin ya a bisa cu Moscu tabata dispuesto pa yuda e Nort construi satelite. Nort Korea a pone su prome satelite spion den orbita november di aña pasa, pero expertonan stranhero ta cuestiona si e satelite ey por produci imagennan cu significancia militar. E intento di e Nort pa lansa un di dos satelite spion a fracasa na mei.
