(AP)—E ehercitonan di Sur Korea, Merca y Hapon a conduci nan prome ehercicio aereo trilateral pa aumenta cooperacion di defensa y fortalece nan capabilidadnan di respuesta contra menasanan di Norte Korea, segun e forsa aereo a declara.
E ehercicio a envolvi un bomber B52 di capabilidad nuclear for di Merca y fighter jets for di Sur Korean y Hapon, segun e declaracion. Sur Korea y Hapon ambos ta aliadonan importante di Merca den Asia, cual hunto ta anfitriona 80.000 tropa Mericano.
E tres pais a tene varios ehercicionan trilateral maritimo, manera esnan anti-submarino of defensa misil, pero e training di ayera a marca e prome biaha cu nan a conduci un ehercicio aereo. Na Sur Korea, pa expande ehercicio militar cu Hapon ta un asunto sensitivo, pasobra hopi ta tene resentimento contra e dominio cruel cu Hapon tabatin riba e Peninsula Koreano durante añanan 1910-45. Pero e programa nuclear di Norte Korea a pusha e presidente di Sur, Yoon suk Yeol, pa pone e disputanan na banda y tene un cooperacion trilateral cu Merca y Hapon.
Na Augustus, Yoon, Presidente Mericano Joe Biden y Prome Minister Hapones Fumio Kishida a reuni na Camp David den e prome cumbre trilateral entre e paisnan y a bay den acuerdo pa fortalece nan cooperacion di defensa pa aborda e menasanan di Norte Korea. E tres lidernan a dicidi pa tene ehercicionan trilater anual y pone e compartimento di data di advertencia misil riba Norte Korea den operacion.
E ehercicio ayera por causa un respuesta feroz for di Norte Korea, cual a critica e ehercicionan Mericano na Sur Korea, yamando esaki un practica di invasion y a responde cu testnan di misil. E banda Norte a critica tambe e acuerdo di Camp David, acusando e lidernan di provocacionnan di guera nuclear riba e Peninsula Koreano.
Preocupacionnan tocante e programa nuclear di Norte Korea a aumenta despues cu e regimen a implementa un ley cu ta autorisa e uzo di armanan nuclear y a habri posibilidad pa uza nan den posibel conflictonan cu Merca y Sur Korea.
