(Infobae) – Estado Brasileño Rio Grande do Sul ta sufri di “e pio desaster climatico” despues di awasero intenso. Segun autoridadnan, e cifra di 29 morto na eteritorio ta bay aumenta cu e paso di oranan.

Gobernador, Eduardo Leite den un conferencia di prensa a lamenta e mortonan y a calcula “cu ta hopi mas” debi na esun cu no ta registra ainda. Den e area teranan a los y inundacionnan a tuma luga for di 48 ora, e desaparecidonan a yega te 60.

“Mi ta lamenta profundamente tur e bidanan perdi, ta 29 morto registra y cu e dolor mas profundo den mi curason, mi sa cu ta bay tin mas,” e gobernador Leite a bisa den un transmision en bibo.

“Gobierno federal ta bay ta 100% na disposicion di estado” pa tareanan di rescate y reparacion, Lula a agrega hunto cu Leite, despues di a yega hunto cu un comision di ministernan na localidad di Santa Maria, un di e municipionan afecta pa awaseronan intenso.

E yobidanan a afecta 147 municipio y ademas a laga 12 herido y 67.860 persona afecta. Casi 9.993 a ser saca for di nan cas, segun autoridadnan. Leite a destaca esfuersonan pa “salba bida” debi na menasa di mas inundacionnan di riunan na estado durante e proximo oranan, tambe a alerta e habitantenan di seis municipio pa otro inundacion di riu Cai, despues cu diaranson anochi a pidi pa evacua e casnan cerca di riu Taquari.

Autoridadnan ademas a informa tocante e kibramento parcial di un dam na Cotipora.

Aunke no ta spera un destruccion den area, volumen di awanan ta bay aumenta e nivel di e riu Taquari, imagennan aereo publica pa gobierno local a mustra areanan grandi cubri pa awa bruin di riu Guaiba, unda nan ta spera cu lo por subi hasta 4 meter den proximo oranan.

Gobierno federal a bisa cu a pone na disposicion un total di 12 aeronave, 45 auto y 12 boto, ademas a manda 626 efectivo di Forsa Arma pa yuda e poblacion afecta, distribui awa y cuminda.

Instituto Nacional de Meteorologia di Brazil (Inmet) a pronostica bientonan fuerte, descarga electrico y yobidanan cu por supera 200 mm na Rio Grande do Sul y estado bisiña di Santa Catarina. Gobierno tambe a informa di dañonan na careteranan, cortenan di coriente y di awa pa centenares di miles di cliente.

Varios municipio ta aisla, sin telefon ni internet. Scolnan mester a cera nan porta y Federacion Gaucho di Futbol a suspende tur e weganan pa e fin di siman aki.

Na september di aña pasa, por lo menos 31 persona a muri debi na e paso di un ciclon na Rio Grande do Sul. Expertonan ta atribui e fenomenonan extremo aki na cambio climatico, cu cada biaha ta mas frecuente na Brazil.