(AP)—Un supuesto misil hipersonico lansa pa Nort Korea a rementa durante vuelo diaranson, segun ehercito Sur Koreano a bisa, mientras Nort Korea ta protesta e despliegue regional di un carrier di aeronave Mericano pa un ehercicio militar cu Sur Korea y Hapon.
Ayera Sur Korea a conduci un ehercicio di candela en bibo na su frontera maritimo cu Nort Korea, su prome desde cu el a suspende un acuerdo di 2018 cu e Norte diseña pa reduci tension militar comienso di juni.
E misil Norte Koreano a ser lansa rond 5.30 di mainta y tabata bulando riba e costa oost di e Nort prome cu el a explota, segun e Joint Chief of Staff Sur Koreano a bisa. Fragmentonan di e misil tabata plama den awa te cu 250 kilometer for di e sitio di lansamento cerca di e capital Norte Koreano, el a bisa. No a reporta ningun daño.
E Joint Chief of Staff a bisa cu e ta kere e arma tabata un misil hipersonico. E lansamento a genera mas huma cu lansamentonan normal, posiblemente pa via di un fayo den motor, el a conta reporteronan.
Nort Korea tin tempo ta conduciendo testnan di misil hipersonico desde 2021 den loke ta parce un esfuerso pa adkiri un habilidad pa penetra e proteccionnan di defensa misil di su rival. Expertonan di afo ta cuestiona si e misilnan a logra nan velocidad y habilidad di maniobra desea durante e vuelonan di test. Den e ultimo añanan, Nort Korea ta desaroyando as misil cu ta usa propelante solido, lansamentonan di misilnan asina ta mas dificil pa detecta compara cu misilnan di propelante likido.
E test ayera a bin mientras e Koreanan rival ta participando den guera psicologico usando blaas y otro locucionnan. Ayera nochi, Sur Korea a bisa cu Nort Korea tabata lansando blaasnan grandi probablemente cargando sushi entre e frontera pa di tres dia tras di otro. Lansamentonan anterior a laga excremento di animal, pida paña y papel di WC cay den Sur Korea.
Nort Korea ta bisa cu e ta respondiendo na lansamentonan di blaas pa activistanan Sur Koreano cu a manda foyetonan politico den e Norte. Dia 9 di juni, Sur Korea a conduci locucionnan di propagando for di speakernan riba e frontera pa prome biaha den varios aña como respuesta riba e blaasnan Norte Koreano. E ehercito Sur Koreano a bisa dialuna cu e ta cla pa cende su speakernan atrobe.
