E suheto acusa di e asesinato di e hoben Argentino Micaela Garcia di 21 aña, a purba viola un mucha muhe di 13 aña, un dia prome cu e asesinato a tuma lugar, caminda e hoben universitario a perde su bida.
Sebastian Wagner ta den prizon provisional mientras e ta wardando riba su huicio, pa acusacion di homicidio. E tabata biba cu su pareha y cu e yiu muhe di e dama cu awe ta morto.
Diabierna 31 di maart, su yiu di crianza tabata den piscina di su cas cu un amiga. “Mi yiu ta amiga di e mucha muher desde scol primario. Ora cu el a bay pa cambia su paña, Wagner a purba di mishi cune. El a dale un golpi y el a huy. Despues nos a wak hopi mensahe”, tata di e victima a conta, segun corant El Clarin a publica.
Parientenan a dicidi pa denuncia e situacion aki, despues cu e suheto acusa di delitonan a manda un mensahe pa amiga di su yiu di crianza, desde e pagina di Facebook di su yiu.
“Abo no sa cuanto mi kier mishi atrobe. Bo ta corda cu bo a duna mi un scop y a cuminsa core? E gana cu mi tin di mishi cu bo atrobe. E proximo biaha mi ta mara bo y asina bo no por core” , Wagner a skirbi riba Facebook di su yiu di crianza.
Progenitornan a bay na polis pa asina trece un denuncia cerca polis, pero a ser manda pa corte di menor, caminda nan a bisa cu mester bolbe dialuna pasobra e “hues cu ta a traha den caso di menor tabata di biahe”, e tata a splica.
Na momento cu nan a pone e denuncia finalmente, cu tabata riba dia dialuna dia 3, nan a haya sa cu e homber tabata como sospechoso tambe den asesinato di Micaela, cu a tuma lugar diasabra pasa.
