Lider di fraccion di AVP, parlamentario Marlon Sneek a referi na e topico di e presupuesto supletorio cu segun e gobierno cu ta formando ta un di e prome retonan cu nan mester confronta ora cu nan ta sinta.
Sr. Sneek ta scucha cu ainda cu mester bin cu un presupuesto supletorio pa asina atende cu e gastonan cu gobierno a haci di mas. E ta haya cu esaki ta gewoon speculacion y “crea un fantasma afo sin bisa e comunidad kico un suppletoire begroting ta”.
El a bisa cu esaki ta un proceso normal cu ta tuma luga normalmente y nos por mira esaki na Hulanda tambe. Segun sr. Sneek e presupuesto supletorio no ta nada mas cu trece un balans entre loke a resta y loke a wordo gasta. Kiermen esaki no ta nifica mas gasto adicional ni debe adicional na loke ya caba a keda presupuesta.
Loke por pasa den e presupuesto supletorio ta cu pa ehempel un proyecto cu no a wordo ehecuta y cu e placa ey no a wordo gasta. Mientras cu den otro departamento tabatin un overtime cu a demanda mas gasto. Nan ta percura cu e placa cu no a wordo gasta por bin bek pa wordo aloca pa atende e gasto ey, el a splica.
“No lubida cu nos ta traha cu normanan. Kiermen ora cu e suppletoire begroting bin, e ta un begroting cu ta bay keda neutral”, el a bisa.
Den sintesis el a bisa basicamente cu den e presupuesto supletorio ta wordo mira e alocacion di recurso di un instancia gubernamental cu a gasta menos di nan presupuesto pa otro instancia gubernamental cu nan gasto tabata mas di loke a wordo presupuesta pa nan.
El a indica cu generalmente overtime ta esun cu ta hunga un rol riba aumento di gasto di un instancia manera cuerpo policial, ora cu ta sosode algo extraordinario. Pero bo no ta bay mira cu un gobierno a gasta mas di locual a presupuesta segun e parlamentario.
