Supervision financiero ta… Malo pa economia…?

Entre e varios argumentonan cu nos por a scucha durante e reunion parlamentario di e siman aki, pa informa e organo legislativo di e estado di asunto den e negociacion cu Hulanda tocante un areglo pa nos debe cu nan, nos por a scucha tambe cu supervision financiero lo ta malo pa nos economia…

Esey a laga nos babuca, honestamente. Tabatin mas argumento cu no por soporta ningun test cu realidad, pero esaki ta un pa gana premio. Ademas cu nos no por a scucha ningun argumento pakico esey lo ta asina. Y nos no mester bay ningun otro pais pa un argumento contrario, pasobra nos propio pais tin ocho (8) aña bao di supervision financiero. Cu hopi hende no lo gusta e supervision nos por comprende, pero esaki a afecta nos economia? Na unda? Desde cu e supervision a cuminza na 2015, economia a crece te na 2019 sin interupcion; e cifranan di Producto Interno Bruto (PIB;GDP) nominal pa e periodo ey ta mustra esey. Crecemento real di GDP a mustra un caida leve solamente na 2019 a causa di inflacion. Despues a bin…, Covid. Nos a sali sumamente bon di e crisis aki, probablemente un di e mihornan pa ‘bounce back’ den nos region. Esey ta danki na e supervision? No, laga nos no crea cos cu no ta existi; nos economia a bounce back pasobra tabatin e oportunidad pa recupera, y e ayudo Hulandes a scapa hopi empresa di bancarota na 2020 y 2021. Pero e supervision riba su mes ta hunga un papel den e proceso economico? No, a menos cu hunto cu e supervision financiero cuminza tambe e proceso di haci economia mas fuerte y flexible, loke mester tuma lugar ainda.

Den e cuadro aki lo ta bon pa nos tira un vista riba un situacion similar di supervision financiero den nos region. Puerto Rico mester a bati alarma na 2015 pa nan situacion financiero, cu un debe publico di 72 biyon dollar, cu a bira impagable. Na 2017 mester a bati bancarota y gobierno federal Mericano a interveni. A institui un Federal Supervision Board cu ta manehando e situacion, unda a pasa den e crisis di horcan y Covid. Gobierno federal a hinca caba mas di 120 biyon dollar den mantene gobierno Puertoriqueño na bida y a reduci e debe te na 34 biyon recientemente. Kico ta e proximo paso? Mehora ‘performance’ economico kitando for di caminda burocracia innecesario pa sector priva por opera mihor, mehora e structura fiscal anticua y mehorando educacion y drechando infrastructura, specialmente red di electricidad cu a keda destrui despues di horcan Maria. Esaki ta zona conoci? Tin hende cu ta kere cu Hulanda ta propone algo parecido cerca nos pa ‘haci fastioso’? No, nan sa demasiado bon si laga esaki pa nos politiconan haci nan mes, e no ta bay tuma lugar, pasobra nan ta bay tene cuenta cu tur e interesnan politico y economico cu NO kier progreso. Ademas, esaki ta e recomedacionnan cu IMF ta propone na tur parti di mundo.

Tambe nos por haci un comparacion cu e otro islanan Hulandes cu tambe tin supervision financiero. Nan economia a sufri di e supervision di Hulanda? Nan falta di progreso economico por sugeri esey, pero ban wak di cerca kico a pasa den e añanan desde 2010. Corsou a perde dos sector economico importante, cu no tabatin relacion cu e supervision, sino cu e situacion internacional riba e terenonan specifico ey. Nan ta e sector financiero offshore, cu a haya golpi grandi, mescos cu esun na Aruba cu practicamente a desaparece. E refineria a bira e siguiente victima di e desaroyo internacional logico, cu a percura tambe na Aruba, St Croix y Trinidad & Tobago pa ciere di tur e refinerianan grandi di exportacion den nos region. E caso di Sint Maarten ta uno special, unda horcan a laga e isla totalmente destrui, cu te awe ainda no tin un recuperacion completo. Den ningun di e dos casonan aki tabata e supervision financiero cu a percura pa daño economico, sino factor externo bon conoci. Cu nan ta den un situacion mas precario cu Aruba, sigur e caso di Corsou, ta pasobra nan no a logra probecha di e rumbo di turismo cu Aruba a tuma tanto aña pasa y a logra pasobra tabatin condicion mas faborable pa e desaroyo ey. Corsou ta na mas o menos un tercio di volumen di turismo di Aruba y no tin perspectiva tampoco pa alcanza e nivel aki. Sint Maarten si por recupera nan turismo manera e tabata caba, na bon nivel.

Nos conclusion ta cu e argumento cu nos ta critica aki, a nace di puro desesperacion y/o ignorancia di e procesonan cu ta tumando lugar na diferente parti di nos region, unda mal maneho gubernamental durante hopi aña a conduci na e situacion cu mester di intervencion si nos kier tin e speranza di mehora nos situacion. No ta supervision ta daña economia, pero burocracia y corupcion si. Paisnan rond mundo cu ta progresa ta percura pa nan tin claridad pa tur empresa, grandi y chikito, pa loke ta nan legislacion y sistema fiscal, y tramite rapido y transparente pa tur. Si ta asina bon nos gobernacion ‘autonomo’ tabata, pakico mester a warda Hulanda bin bisa nos kico pa haci? Y pakico e tardanza grandi cu tin den ehecucion di e proyectonan di reforma, como si fuera ta ‘neo-colonialismo’ y hasta ‘sclavitud’ ta bolbe pa nos? Ki dia cierto di nos politiconan ta madura y informa nan mes mihor?