Un hoben manifestante a strip sunu riba autopista Francisco Fajardo na Caracas y cu su biblia den su man a subi riba e dak di un tanki blinda di Polis Nacional Bolivariano. E polis hopi furioso a tir’e cu perdigon pa asina logra cu e suheto baha for di e tanki.
Video riba red social ta mustra e respuesta violento di banda di polis, pero no sa ainda si e hoben a keda deteni of no. Den un video por tende e peticion di e hoben aki na e grupo di polis, ora el a bisa: “por fabor, no lansa mas bom”
Guardia nacional di Venezuela a tira hopi gas lacrimogeno riba marcha y concentracion di grupo di oposicion na diferente punto di Caracas. E grupo di oposicion tabata purba di marcha pa sede di Defensoria di Pueblo.
Hopi parlamentario di oposicion a publica video riba Twitter, tocante situacion na Venezuela denunciando represion di banda di forsa di seguridad, specialmente na El Paraiso y Santa Monica.
“Guardia nacional a agredi nos atrobe, nan a tira mas bom lacrimogeno riba nos curpa, y nan no ta pensa riba e daño cu nan por causa nos”, José Manuel Olivares, diputado di Primero Justicia (PJ) a declara. Oliveros a informa cu el a haya un golpi di un bom lacrimogeno cu a ser tira “a quemarropa”, es decir di hopi cerca di su curpa pa Guardia Nacional Bolivariano na avenida O’Higgins na El Paraiso.
Diputadonan di oposicion Gaby Arellano y Juan Miguel Matheus a bisa cu na otro sector di Caracas manera Santa Monica, Guardia Nacional a disolve e concentracion cu gas lacrimogeno. Parlamentarionan a mantene nan yamado na tur hende pa participa y bay den e concentracion y despues tur hende mobilisa te centro di Caracas.
Oposicion di Venezuela a haci yamado pa continua cu mobilisacion y asina purba di bay te Defensoria di Pueblo, despues cu e jornada di protesta di diaranson 19 april a culmina cu 3 hoben cu a fayece pa tiro di arma di candela. Dos di nan tabata hende civil y e otro tabata un funcionario di Guardia Nacional.
Durante protesta di dia 20 di april a registra hopi hende herida y mas di 500 persona deteni. Mobilisacion di ayera a ser convoca pa aliansa Mesa de Unidad na 26 punto di Caracas, mesun recorido cu mobilisacion di 19 di april.
