Durante un conferencia di prensa ofreci pa e medionan local a informa di e evento ‘Sunset Awareness Ride’, cu participacion di gruponan di motorcycle, pa asina crea mas consenshi den comunidad di loke ta trata e mundo di motorcycle.
Jairo Maduro, director di Aruba Driving School y organisado di evento, hunto cu Vladimir de Cuba, boluntario di Motor Unit, Roderich Schwengle di grupo Shoco Legend y Jay Maduro, miembro di Aruba Driving School, durante e conferencia di prensa a splica di e evento aki, cu lo tuma luga mañan diahuebs, dia 30 di mei desde 4or di atardi na Do It Center di Shaba y lo caba 7or cu e sunset na Arashi.
Jairo Maduro a comenta cu e motibo pa cual nan a cuminsa organisa e evento aki ta pa via cu nan a ripara cu ultimamente demasiado accidente ta sosode cu motociclistanan y automobilistanan. Tambe principalmente cu e luna di mei ta e luna di conscientisacion di motorcycle na nivel mundial.
Di mesun manera, Maduro a expresa cu esaki ta e prome aña cu nan a cuminsa cu e evento di conscientisacion pa via di e accidentenan cu a sosode, y cu nan tin e necesidad di haci algo riba e problema ey.
Asina mes, el a manifesta cu e mesun dia na parkeerplaats di Do It Center, e Motor Brigada di Cuerpo di Polis di Aruba lo bay haci un ‘driving demostracion di siguridad’, unda nan lo haci diferente maniobra riba brommer specialmente pa motociclistanan, con nan por reacciona of evita un accidente.
‘E evento aki ta pa crea consciencia, pa asina nos por tin un bida sigur riba careteranan publico’, Maduro a enfatisa, y tambe a declara cu e problema di accidente cu brommer na Aruba ta asina, cu tin un accidente pa siman aproximadamente.
Ademas, el a sigura cu e evento no ta dirigi solamente na e gruponan di motorcycle cu lo participa, manera Camacuri, Shoco Legend, Di Nos Cu Nos, entre otro cu a confirma participacion, sino tambe el a haci un yamada pa tur persona cu ta riba motorcycle of scooter pa acerca na Do It Center mañan.
Di su banda, Vladimir de Cuba, boluntario di Motor Unit a bisa cu esaki ta un iniciativa cu no a wordo haci na Aruba, y ta hopi importante pa conscientisa e automobilistanan, motorcyclenan y esun cu ta core cualkier brommer pa ta consciente riba e trafico rond di nan, y e peaton unda cu tin riba caminda.
“Tin biaha cu e auto no ta worry cu e brommernan, pero si nos ta consciente y pone atencion, bo por evita e mayoria di e accidentenan aki”, De Cuba a sigura.
Tambe el a comenta cu e personanan cu ta coriendo conscientemente por evita cierto accidente of e golpinan cu hopi biaha ta grandi, e desbentaha ta cu nan no tin un auto cu ta protege nan mes.
De Cuba a enfatisa cu nan parti como boluntario di Motor Unit ta un grupo di motociclista cu ta yuda cera diferente caminda den caminata, evento y otro, cu tin 4 aña di existencia, y cu nan ta coopera pa yuda tene e participantenan na caminata of evento un tiki mas protegi. Nan tambe lo bay ta presente den evento aki, pa brinda e proteccion na e participantenan.
Jay Maduro, kende ta miembro di Aruba Driving School, a finalisa e conferencia bisando cu nan a organisa e evento aki pa motibo cu nan como coredo di brommer sa ‘con dushi e coremento di brommer ta, pero tambe ta hopi peligroso’, y p’esey nan ta bin cu e evento aki pa respeta otro, pa e chauffeurnan tin respet riba brommer y autonan mes.
