Den añanan tras di lomba, a detecta cu filternan di UV cu crema sunscreen ta contene, a aumenta gradualmente den lama na costa. Tin indicacion cu e filternan di UV ta sigui haci coralnan debil, y di tal forma laga awa di lama cu ta aumenta di temperatura a consecuencia di keintamento global sigui haci daño na e coralnan. Esaki ta e conclusion di un estudio recien haci pa Wageningen University & Research (WUR).

Segun un comunicado di prensa, cientificonan di WUR den un laboratorio a eleva temperatura di awa den baki di dos tipo di coral di piedra, di 26 grado pa 33 grado Celsius pa imita e efecto di cambio di clima. Ademas a agrega e filter di UV oxybenzon na e awa. E nivelnan di oxybenzon tabata basa riba e nivelnan cu a reporta cu tin na lama di costa di Bonaire.

Stress prolonga

A investiga e coralnan pa mas cu seis siman. “Esaki tabata unico”, segun Diana Slijkerman di Wageningen Marine Research a bisa. “E investigacion aki di stress normalmente ta di tempo cortico, pero e exposicion cronico aki na un concentracion abou di substancia dañino a duna nos oportunidad di imita e situacion manera tin den naturalesa lo miho posibel.”

A resulta cu e efecto di temperatura cu a subi ta mas grandi riba e salud di e coralnan, pero e resultadonan na sugeri tambe cu crema solar ta haci e daño na e coralnan te hasta mas grandi. Slijkerman: “E awa di lama cayente ta e menasa mas grandi, pero ta mustra cu oxybenzon ta agrega daño pa lastima e coral cu ta debil caba den asunto di keintamento global.”

Rifnan di coral bou presion

Rifnan di coral ta bou presion rond mundo a causa di aumento di temperatura di awa di lama, baymento atras den e calidad dia wa di lama, malesanan y acidacion. Recientemente un presion nobo a bin acercaL presencia di nivel halto di filter di UV den awanan na costa, causa pa uso di crema solar cu landadonan ta haci uso di dje.
Pues e estudio aki ta pone enfasis riba e importancia di medidanan local. “E problema mayor ta cambio di clima, anto localmente abo por tin un tiki influencia riba esaki”, Slijkerman ta splica. “Pero abo sigur tin control riba e calidad di awa.” Esaki no ta asunto di contaminacion di crema solar, sino tambe por ehempel laga awa di sushi core bay y di erosion.

Foto: Y.+T. Kühnast