Sunrise Park na San Nicolas no a haya su mantenemento debi y p’esey su produccion a baha

Dia 2 april ultimo, Bon Dia Aruba a publica un articulo cu e titulo “Parke solar aeropuerto y San Nicolas no ta duna nada, segun datonan di WEB Aruba N.V.” Pa esaki redactor di Bon Dia Aruba a puntra minister encarga cu e cartera di Energia, Glenbert Croes, kico ta e situacion di e dos luga na e momentonan aki.

Minister Croes a señala cu na aeropuerto e parke solar ta full operativo: “ta produciendo alrededor di 3.5 megawatt di electricidad pa Elmar, esun cu tabatin problema, pero esey ta door di mantenemento y p’esey e proyecto na e momentonan aki ta bao mantenemento. Ta e parke solar na San Nicolas cu ta cay bao di WEB, aunke ta riba teritorio di Refineria di Aruba (RDA).”

Aworaki segun el a señala, WEB ta haciendo un inversion di mantenemento pa nan por pone e parke solar aki na San Nicolas ful operativo back, y p’esey e produccion a baha debi cu tabata falta inversion pa mantene e area aki.

For di algun tempo redaccion di Bon Dia Aruba ta siguiente e asunto di produccion di energia renobabel na Aruba. Desde inicio a ripara cu ta aparece cifra asina abao di produccion di energia solar, cu ta imposibel cu lo tabatin un proceso normal andando na e dos facilidadnan, en vista di e hecho cu e parti mayoritario di e capacidad instala (alrededor di 9 MW) ta na e dos facilidadnan aki.

Riba e grafico presenta aki, procedente di december 2022, por observa cu WEB mes ta indica cu e cifra ‘Year To Date’ (YTD) ta duna cu e produccion promedio di henter 2022 no tabata mas di 0,7% di produccion total. Gran parti di e produccion, en total 110 MW, naturalmente ta bin di uso di heavy Fuel Oil (HFO), 87,2%, mientras e parke di molina na Vader Piet ta percura pa gran parti di e tipo di fuente aki: 12%.

Na 2022 un reportero di BDA tabatin un combersacion cu vocero di WEB Aruba NV tocante nos impresion cu e parke solar na San Nicolas no tabata operando y cu nos redaccion tabata desea mas informacion tocante esaki. Sin embargo e mensahe tabata cu e compania lo no tabata dispuesto di duna informacion encuanto e tema aki.

Segun informacion obteni riba internet, e parke solar aki inaugura na 2017 door di gobierno anterior, tabata supone di duna casi 50% di energia limpi y renobabel pa 2018 pa supuestamente haci Aruba un di e islanan cu por a genera mas energia solar den Caribe pero awor sin e mantencion necesario cu mester wordo haci e no ta produciendo nada di loke a wordo priminti.