Hospital, e specialista y Pais Aruba mester paga un victima di fayo medico un suma di 80.000 florin na daño inmaterial. Esaki ta un suma record pa casonan asina.
Nan a kita e pecho di e victima sin cu tabatin un necesidad medico, asina e veredicto di 23 di november ta bisa. E abogado Richie Kock a informa esaki como cu e kier informa comunidad di esaki y e posibilidadnan cu ley ta duna pa victimanan den ley civil por busca compensacion pa daño inmaterial (sufrimento emocional) y cu e caso aki ta mustra, ta bale la pena.
Corte den Prome Instancia ta haya cu e kitamento innecesario di e pecho a afecta su integridad fisico seriamente y asina merece un compensacion substancial.
E abogado Kock tambe ta splica cu e victima ainda por exigi compensacion pa daño material; esaki ta encera entre otro daño pa motibo cu e victima no por traha mas of sea produci entrada. Pa cu e ultimo den caso di fayecimento, e famia di e pashent por exigi un compensacion pa daño material a base di e articulo 6:108 di e codigo civil, asina abogado Kock ta splica.
Ley na caminda
E ta remarca si cu ainda mester bin ley adicional pa compensa famia di victima pa daño inmaterial (sufrimento emocional). Pues den un caso cu e pashent a muri of keda incapacita, e famia no por exigi compensacion pa daño inmaterial. Na Hulanda a purba di introduci e ley caba na 2003 pero Parlamento no a aproba esaki. Aña pasa un proposicion nobo a bay Parlamento y den e caso cu lo logra, esaki tambe tin su consecuencia pa Aruba mirando cu leynan den Reino mester ta den concordancia.
Sr. Kock tambe ta duna mas informacion riba e cantidad di e kehonan cu Horacio Oduber Hospital a ricibi. No tin cifra nobo ainda, pero na 2014 un total di 154 pashent a entrega un keho y aña anterior e cantidad tabata 193. A base di e informacion di hospital e abogado ta conclui cu e kehonan ta varia. Nan ta bay over tratamento medico pero tambe pago. Abogado Richie Kock a termina bisando, “E relato no ta specifica kico exacto y cuanto ta trata di fayo medico.”
