E posibilidad pa opera un casino den Barceló Hotel ta un realidad. Cuater parti ta envolvi pa firma e acuerdo mutuo aki: Island Gaming Aruba; Hotel Barceló; FDA y Gobierno di Aruba, caminda nan lo percura pa traha conhuntamente na interes di tur e partidonan envolvi; y asina traha riba e solucionnan di asuntonan ainda pendiente.

Mediador di Gobierno, Anselmo Pontilius a percura te cu ultimo ora pa busca alternativanan pa e operacion di e casino aki (ex Aura Casino) lo por bira un realidad. Despues cu luna pasa un caso a tuma luga den corte entre sindicato FTA y e operador interesa pa opera e casino, a conduci cu  Island Gaming Aruba a informa cu nan no tabata interesa mas opera dicho casino. Ora cu e crisis aki a surgi, Mediador di Gobierno a sinta cu e partidonan separa durante e ultimo simannan.

Sr. Pontilius  a bisa cu e proceso aki no a resulta manera nan a desea, pasobra como Mediador nan a propone un salida pa e 18 trahadonan cu ta afo y cu no a haya trabou. Nan lo haya un suma den todo caso cu no ta e 10 of 12 lunanan cu nan ta reclamando, pero cu por yega na un areglo. Te ainda no a yega na un acuerdo riba e suma cu e trahadonan eventualmente lo ricibi cuater luna di salario cu ta loke e operador a ofrece; y riba e punto aki tin un acuerdo den principio.

“Tur indicacion ta mustra cu e operador cu e hotel lo ta dispuesto pa dal bay y opera e casino.”


Salarionan pendiente

Encuanto con lo para cu e caso den corte caminda e trahadonan ta exigi e pagonan di nan salarionan pendiente, FTA ta bisa cu si tin un of mas trahado cu no tuma e acuerdo di cuater luna,nan lo kier un sentencia di hues y haya e resultado ariba dje. Mientras cu e compania operador di e casino a bisa cu si esey ta e caso nan lo tin cu warda.

“Tur indicacion den liñanan grandi ta cu bo por haya bo cu un apertura di un casino cu tin un  aña cu el a cera”, Mediador di Gobierno ta bisa.

 

El a agrega cu mester tene cuenta cu casino no ta manera antes, ya cu e ta un casino mas chikito. Di otro banda a base di loke a sosode cu e caso di ex Aura Casino, sr. Pontilius ta considera cu como pais y como Gobierno, nan mester saca un les for di esaki pa wak con lo por atende cu caso asina. Nan por a mira empresa manera Sr. Frog cu a cera, y e inkietud ta keda si mañan otro grupo cu ta interesa pa habri e luga ey cu ta continuidad di e mesun negoshi si ta nifica cu ta mara na e responsabilidad ey di casi 30 trahadonan. “Esakinan ta puntonan cu aworaki a sali dilanti y riba esaki ta interesante si tin un sentencia di hues, con hues lo opina ariba e aplicacion di e ley nobo.”

Ta trata di aplicacion di e articulo nobo 1615db di Codigo Civil. E articulo aki ta stipula cu den caso di un ‘overgang’ (traspaso) di un empresa, di un dunado di trabao pa otro, pa ley (‘van rechtswege’) e obligacionnan pa cu e trahadonan ta pasa pa e dunado di trabao nobo cu ta bay opera e empresa.