Ministerio Publico (OM) a tuma nota di e declaracionnan cu e psikiatra Rita Zecher Enahoro a duna na prensa Hulandes pa cual nan ta reacciona riba esaki. Sra. Zecher Enahoro a yega di traha como psikiatra na Aruba y ta e autor di e buki BOA cu a capta hopi atencion recientemente, ya cu e buki ta papia riba diferente casonan di abuso sexual di mucha aki na Aruba. E buki mes a keda publica na 2012.
Segun un comunicado di OM, Procurador-General di Aruba Alexander van Dam no ta reconoce su mes at all den e imagen di Aruba cu ta wordo pinta den e noticianan aki. “E ta lamenta profundamente cu nos y otro medionan di comunicacion na Hulanda no a haci uzo di e regla periodistico di scucha ambos banda di un medaya, prome cu sigui cu publicacion”.
E comunicado di OM ta sigui bisa cu e imagen cu sra. Zecher Enahoro ta pinta di e situacion Arubiano ta incorecto y no ta basa riba echonan. “Loke señora Zecher Enahoro ta sugeri, esta, cu fiscalnan di husticia lo tin miedo pa persigui un sospechoso, ta puro nonsens”, segun OM. Tambe e imagen cu Aruba lo ta un destinacion di sex pa turistanan pedofiel ta algo cu Ministerio Publico no ta reconoce at all. No ta existi ningun sorto di prueba cu esey lo a pasa of lo ta pasando segun OM.
“Señora Zecher Enahoro a traha na Aruba di 2008 te 2010. Ta berdad cu JZP no tabata bon na ordo den e añanan ey. Tanto Ministerio Publico como Cuerpo Policial di Aruba a haci nan maximo esfuerzo den e añanan despues pa traha riba casonan di zeden y persigui sospechosonan di zeden. Generalmente por bisa cu casonan di zeden hopi biaha ta dificil, pasobra frecuentemente ta trata di casonan one-on-one, den cual e declaracion di e victima ta para linea recta contra esun di e sospechoso. Esey ta nifica cu mester haci uso di capacidad grandi di recherche pa, den cuadro di haya sa e berdad, yega na un caso penal cu por wordo persigui”, e comunicado ta termina bisando.
