Fiscal di Suecia a bisa dialuna cu lo bolbe habri e caso di violacion contra e fundado di WikiLeaks, Julian Assange. Tambe lo busca su extradicion di Inglatera.
Eva- Maria Persson, diputado co-director di fiscal publico di Suecia, a bisa cu tin e posibel sospecha cu Assange a comete un violacion. “Mi evaluacion ta cu lo rekeri un interogatorio nobo cune”, e la bisa.
Fiscal a presenta cargo preliminar contra Assange despues cu el a bishita e pais na 2010, unda dos muhe Sueco a keha cu nan tabata victima di abuso sexual di Assange. E caso a wordo bandona na 2017, pero ainda ta existi un acusacion di violacion.
Autoridad di e pais a bisa cu a bandona e caso pasobra Assange tabata biba na embahada e tempo ey, y no tabatin posibilidad di mand’e Suecia. Assange ta nenga cualkier iregulidad, afirmando cu e acusacion tin motivacion politico y cu sex tabata cu permiso.
Assange ta enfrenta un interogatorio na Suecia, ademas di un orden di extradicion na Merca pa conspira cu ex-analista di inteligencia pa piratea un computer di pentagono. Abogado di Assange, E. Samuelson, a bisa cu e decision di habri e caso di violacion ta ‘indignante’, pa trece un storia di 10 aña pasa.
Elisabeth Massi Fritz, abogado di e muhe cu a denuncia e supuesto violacion, a bisa cu su cliente ta sinti un gran gratitud pa e decision di habri e caso, ‘esaki ta indica cu niun hende ta riba ley’. Cu e sistema di e pais no ta duna trato special na ningun hende.
Nomber di e muhe no ta conoci publicamente, pero un di nan el a conoce na un conferencia di organisacion di evento social democratico na 2010, y Assange a hib’e su apartamento. E otro muhe tabata parti di audiencia. Un polis a tende e caso di ambos muhe, y a sospecha cu ta victima di abuso sexual, y entrega caso na fiscal. Assange ta enfrenta un maximo castigo di 4 aña di prizon na Suecia.
