A firma un acuerdo entre Departamento di Mucha y Hoben conhuntamente cu Bureau Sostenemi tocante e palabracionnan y accionnan laboral na momento cu tin sospecho di abuso di mucha den un centro di cuido na Aruba y na unda a sigura cu casonan di negligencia door di mayornan ta aumentando na Aruba.

Sue-Ann Ras ken ta fungi como beleidsmedewerker di Ministerio di Husticia y Asuntonan Social hunto cu Maritza Maduro representante di Bureau Sostenemi ayera mainta den un conferencia di prensa a señala cu nan a logra yega na un convenio laboral pa lo cual ta trata Codigo di Proteccion den e centronan di cuido di mucha na unda tur ta hancra na Departamento di Mucha y Hoben.

Ras a sigura cu esaki tabata un proceso basta largo, pa motibo cu esaki ta trata di cinco paso pero ta importante pa e pasonan aki den e 87 centro di cuido registra oficialmente por ser tuma na momento cu tin un sospecho di abuso di mucha, di kico mester haci, na unda mester yama y kico ta e camindanan cu mester cana haciendo uso di e cinco paso di e Codigo di Proteccion.

“Pa nos ta hopi importante pa tin procesonan structural pero tambe con nos por traha cu otro, kico nos por spera di otro den e aspecto laboral,” Ras a bisa.

E parti di mas importante pa nan pa ta empodera otro, esaki ta pone cu Codigo di Proteccion ta un ley y banda di esaki e ora ey mester pasa e cinco paso uniforme, nan sa cu centronan di cuido no tin un structura manera enseñansa cu tin diferente otro aspecto cu lo por yuda den e structura di cuido, den centro di cuido no tin esey ainda pero si tin intencion for di Departamento di Mucha y Hoben pa nan lo por yega na esey.

Tin mas centronan di cuido cu no a registra manera Ras a comenta y ta importante pa nan tur sa kico ta e liñanan cu nan mester cana pero tambe kico nan por spera di Departamento di Mucha y Hoben cu Bureau Sostenemi.

Pa e motibo ey nan a pone dos supervisor di Codigo disponibel pa nan por haya informacion di cua centro ta cay bao di cua supervisor pa duna nan e guia y e sosten na momento cu tin un caso di sospecho di abuso di mucha den un centro di cuido.

E proceso ta cu awor nan ta haciendo supervision den tur e centro di cuido y esnan cu no ta registra, nan mester cuminsa cu e proceso pa registra manera ley ta indica sino hasta por cera nan.

Ras tambe a bisa cu nan ta traha cu e parti di sospecho di abuso di mucha pa lo cual el a splica cu esey ta algo hopi desapuntante pa mira con mayornan pa hopi biaha, nan ta e prome cu ta comete abuso mucha door di negligencia y esey nan ta mira diariamente.

Nan ta hayando mas cu un tipo di abuso di mucha cu ta sosodiendo segun Ras a afirma y esun cu mas ta resalta ta e parti di negligencia loke ta nifica cu mayornan tambe mester asumi nan responsabilidad, na momento cu ta scoge pa tin un yiu, e ta bin cu responsabilidad riba dje.

“Di lo cual cu nos ta experiencia, mi por bisa cu dia pa dia e casonan ta birando mas compleho y esey ta lo cual nos ta bibando diariamente,” el a bisa.

Di su parti, Magaly Maduro di Bureau Sostenemi a bisa cu nan ta hopi contento na unda despues di un temporada basta largo, ayera nan por a firma un acuerdo di trabou y ta importante pa keda hancra den ley ademas pa sa ki ora y ken tin cu haci su trabou.

Maduro a expresa cu mester sigui e cinco paso di e Codigo di proteccion sin excepcion y den caso cu e persona por keda pega den un paso, e por pidi ayudo na dos supervisor cu tin pa cierto cantidad di centro di cuido di mucha. E supervisor ta e persona cu por duna e guia na prome instante, si ta un caso mas grave, por tuma contacto cu Bureau Sostenemi.