“Ami Sin Cancer” ta e buki nobo di e autor Romulo Fingal. E buki aki ta conta kico Sr. Fingal a haci pa ta un sobreviviente di cancer di prostaat.
Durante e presentacion di su di cinco buki, Fingal a bin cu conseho radical pa esunnan victima di e malesa aki. Un articulo cu el a lesa di Johns Hopkins Hospital ta conseha cu pa combati cancer bo mester lag’e muri di hamber. E cuminda preferi di cancer ta acido, entre nan sucu. P’esey e ta declara sucu ta enemigo number uno pa e pashentnan cu cancer. “Sucu ta cuminda pa cancer”, el a bisa.
Sucu y acido alcalino
El a bin cu critica hopi fuerte riba consumo di sucu y te hasta di bebidanan cu habitualmente nos ta consumi localmente. Nan por resulta dañino pa nos salud considerando e cantidad grandi di sucu cu nan ta contene.
Pero no solamente sucu. Aunke e no ta dokter, Fingal a skirbi su buki a base di su experiencia di bida y di loke el a pasa aden fei ora cu el a wordo diagnostica cu cancer. E ta conta loke el a haci pa sobrevivi. E ta lamenta cu otro pashentnan cu a wordo diagnostica cu cancer den e mesun temporada no t’ey mas.
El a declara na Bon Dia Aruba cu e meta tras di e buki aki ta esun di conscientisa nos pueblo. E ta mirando hopi amigo cu ta muriendo di cancer, y no tin solucion. P’esey den cuater aña cu e mes a sufri di cancer, el a inspira su mes riba e teoria di e dokter Hulandes, Burgmans.
El a documenta su mes hopi bon pa por skirbi e buki aki. El a consulta diferente fuente pa averigua cua cuminda tin alcalino mas halto. El a dedica tres aña y mey pa bin cla cu e buki aki cu a cay den bon tera durante su presentacion na e sede di Arubiana/Caribiana di Biblioteca Nacional Aruba.
Mester tin cuidao cu tur cos cu tin di haber cu acido alcalino, el a bisa. E cuminda ta afecta e pH (pH ta e medida di acido alcalino), mas cu tur cos. P’esey den su lucha contra cancer e no solamente a elimina sucu sino lechi, carni cora y alcohol. Tambe tin otro factornan, pero e ta pone atencion riba e parti di nutricion.
Sistema di bida y sistema immuun
Tur esaki ta demanda un cambio den bo estilo y sistema di bida, pasobra den e mundo moderno aki unda tin tanto fast food y bebida cu hopi sucu, nos tin cu siña come di nobo, el a bisa. Specialmente come mas saludabel cu hopi berdura fundamentalmente sin cu necesariamente bo mester bira vegetariano. E ta reconoce cu e proceso aki no ta facil. E mes tabata un gran comedo di bolo, pero ora cu el a haya sa cu sucu ta cuminda pa cancer, el a lucha pa elimina sucu for di su dieta diario.
E ta bisa cu mester come cuminda saludabel como bo vitamina. Sino bo mester bay consumi pildo como bo cuminda. Esaki e ta haya cu ta e experiencia di hopi hende cu ta consumi pildo pa via di e malesa aki. E hendenan no mester depende hopi di remedi sino di e cuminda cu nan ta consumi. Pasobra bo cuminda ta bo vitamina, segun Fingal. E ta kere cu un di e motibonan cu hopi hende ta muri despues cu ta wordo trata cu cancer ta pasobra nan no ta cambia e sistema di come pa uno mas saludabel.
El a bisa cu e mensahe den su buki ta con el a lanta su sistema immuun pa combati e cancer y otro malesanan. Ya cu como pashent bo por haya tur sorto di ayudo y tratamento entre otro bestraling. Dokter ta purba di yuda bo pa cura bo malesa of pa bo por haya cierto alivio. Pero si cos ta sigui ripiti, e ta haya cu e pashent mester pone di su banda pa purba di cura bo mes pa medio di lanta bo sistema immuun cu cumindanan saludabel.
E ta conseha pa come mas tanto e berdura curu pasobra stoba e cuminda cu berdura pa tempo largo ta acido bo ta come. Igualmente e ta conseha e consumo di frutanan cu no ta mucho sucu. Den su buki e ta bin cu un serie di conseho of recomendacion relaciona cu e parti aki.
No mester gaña bo mes ya cu bo mester tuma e cos aki hopi na serio, el a bisa. Kiermen e persona mester bin cu un determinacion pa no cay den e tentacion di kibra e estilo di bida aki y evita cu nan ta bay atras hopi pisa. P’esey ta importante den e lucha aki pa no gaña bo mes y fortalece bo auto stima.
Sr. Fingal a anuncia cu ta trahando riba otro buki cu eventualmente lo keda publica otro aña tocante receta of cuminda alcalino. E buki nobo Ami Sin Cancer ta obtenibel na Centro Kibrahacha, unda Sr. Fingal ta traha como boluntario pa basta aña caba. Tambe e ta miembro di e Fundacion Contra Cancer di Prostaat pa nan conscientisa e hendenan homber tocante e peliger di e cancer aki cu bo no ta sinti nada. “E ta un silent killer.”
