Sucesonan grandi… Pero kico nos ta siña…?

Dos suceso a capta atencion publico e siman aki. Uno ta e reunion tan anticipa di parlamento pa trata e cambionan den e ley di Serlimar, cu awor a haya un pausa, pa continua aki un par di siman. Tin hopi cu ta duda di e motibo oficial duna, cu un parlamentario mester a biaha y mas bien ta pensa cu varios parlamentario no tabata dispuesto di duna na aprobacion. Laga nos kere e ultimo aki, pasobra e ora nos ta toca un punto positivo di e reunion y esey ta cu a tuma e obhecionnan, en todo caso cierto di nan, na serio.

A pesar di e cambionan anuncia cu cual e reunion a cuminsa, a keda varios otro punto cu mester haya contesta ainda. E incertidumbre cu no a kita ta tur loke ta sucede alrededor di e proyecto di incinerator, cu di berdad no tin nada di haci den e ley cu ta trata operacion di Serlimar. Ora yega asina leu, laga e mandatario concerni pone su cartanan riba mesa y laga parlamento huzga. Tabata demasiado obvio cu a trata di adelanta e bataya di e incinerator den e ley aki, pa kita diferente obstaculo (rival) for di caminda.

Un di e aspectonan cu a bin dilanti claramente ta tambe cu varios parlamentario a mustra di ta consciente di e hecho cu bay di acuerdo cu e ley sin mas lo a significa un ‘ayo definitivo’ na cualkier pretension di e gabinete aki cu nan ta pro un economia circular, cu nan ta pro un desaroyo sostenible, etc. Henter e pantaya ey lo a bin abao si ta permiti un empresa estatal bari henter e competencia for di e sector. No ta trata aki solamente di EcoGas/EcoTech sino tambe e iniciativanan di tamaño mas modera, pero cu tur ta contribuyendo na un proceso y maneho miho di desperdicio, y tambe na un medio ambiente mas sano y sostenible.

Sin embargo, a pesar di e puntonan positivo cu nos por a observa den e reunion di antayera, nos ta keda cu e preocupacion cu pa un motibo te awe ningun hende den gobernacion por splica na un manera drechi pakico gobierno(nan) no ta dispuesto di haci mas cu ‘lip service’ ora ta trata di e leynan general cu mester duna e cuadro pa leynan mas detaya riba cierto aspecto. E ley di Serlimar mes ta un bon ehemplo: ta traha riba e ley specifico aki, pero no riba e framework mas general pa loke ta desperdicio, y mas en general tambe pa maneho ambiental. Un pais cu ta gaba cu pa casi un siglo e tabatin un refineria, y te awe no tin nada regula ni pa esaki, ni pa nada otro. Si esey ta keda e maneho, anto gobierno por cuminsa economisa aki mandando e departamento concerni pa santana y usa e placa pa otro cos. Of: haci un trabao drechi.

E otro noticia grandi ta concerni e caso cu hopi tabata spera pa basta tempo, y cu no tabata parce di avansa. Mientras hopi hende tabata rabia y frustra pasobra no tabata mira nada ta sucede, mester bisa na fabor di e autoridadnan concerni cu e caso Ibis a tuma tur loke tabatin disponible na capacidad. Y talvez e caso aki, Avestruz, lo surpasa e 20.000 pagina di Ibis. Si esaki ta e caso anto no por spera tanto resultado a corto plazo tampoco, mirando e cantidad di trabao cu e ta encera. Tumando como punto di salida semper cu cada ken ta inocente te dia nan keda condena, nos lo no bay den detaye personal, pero si comenta na nivel general. Pa cuminsa e caso aki por tin ramificacion cu ta conduci autoridadnan hopi mas leu cu solamente e corupcion den emision di tereno y e traspaso posterior na otronan di loke a obtene gratis di gobierno. E sumanan miyonario cu tin envolvi den compra di tereno cu na inicio tabata gratis ta mustra riba labamento di placa na gran escala, cu consecuencia pa tur esnan envolvi den esaki.

Pero, e tin consecuencia pa nos tambe. Con nos por papia di diseña y stipula un maneho y planificacion economico, si nos ‘planificacion’ ta den man di esnan cu ta ‘wheel and deal’ pa haya tereno pa haci loke nan kier, unda nan kier… Nos maneho economico no ta cuminsa na Asunto Economico, sino na ministerio di Infrastructura, Desaroyo Teritorial y Medio Ambiente. Di e manera aki formulacion di cualkier planificacion economico ta bira algo di risa, pasobra no ta ey ta tuma e decisionnan clave. Na momento cu un empresario, cu bon o mal intencion, haya e tereno cu e ta desea, si el a paga bao mesa of no, e otro permisonan cu supuestamente e mester, a bira algo practicamente irelevante. Si nan tabata relevante, con por ta cu te awe tin hotel cu ta opera sin permiso?

Nos por ta satisfecho cu awor husticia, aunke laat, ta actua contra corupcion grandi? Sigur cu si, pero mester sucede mas. Nos tin miedo cu gobierno ta keda pega den plama propaganda tocante ‘integridad’ pero den practica no ta avansa den haci nos sistema gubernamental mas ‘crookproof’. Nos no por depende di casonan incidental hudicial so, mester mehora e control interno. Ki dia?