Suceso mundial… Tambe por afecta nos…

Den pleno campaña electoral naturalmente atencion ta bay principalmente na loke ta sucediendo na nos isla mes. Sin embargo, pa por tin un imagen mas completo di loke ta anticipa pa e proximo periodo di gobernacion nos mester contempla tambe loke ta pasando den mundo. Esey especialmente pa asunto o suceso cu por afecta nos directamente. En general, e perspectiva economico pa nos ta faborable. Nos tin un economia cu ta creciendo mas rapido di loke tabata spera y si no pasa nada grave na nivel internacional, esaki no ta nos preocupacion mayor; asina e ta parce en todo caso. Pero, sin duna un impresion alarmista di loke por bay tuma lugar, ta necesario pa tuma na cuenta e estado actual di sucesonan mundial cu por cambia nos perspectiva.

Por ehemplo, ban tuma na cuenta loke ta pasando ultimamente na Merca, e pais cu ta nos partner economico mas importante, tanto pa loke ta turismo, nos actividad principal, como tambe e pais for di cual nos ta importa gran mayoria di producto di uso den economia y comunidad. Dentro di menos di dos luna lo tin un presidente y gobierno nobo na e pais, cu tin e intencion di hiba un politica diferente riba tereno economico. Manera presidente electo Trump a bisa durante henter su campaña, e ta bay impone tarifa extra di importacion pa producto cu ta bin di e partnernan economico mas importante: China, Mexico y Canada; 25% pa e ultimo dosnan y 10% extra riba loke tabatin caba pa China. Esaki lo conduci na un aumento di costo di tur loke ta importa di e tres paisnan aki y lo aumenta (atrobe) inflacion na Merca. Fuera di esey lo tin un respuesta di igual indole di e otro paisnan, loke ta haci cu exportacion di Merca pa e paisnan aki lo bira mas caro tambe. Pa un industria manera di auto, cu tin un intercambio intensivo di pieza entre pais promer cu yega na e producto final, esaki lo tin consecuencia grandi. Pero esey no ta tur pasobra e guera di tarifa di importacion por extende den direccion di otro pais, manera Union Europeo y Gran Bretaña, loke por ocasiona repercusion economico pa gran parti di mundo. Awor, e pregunta ta pakico e medidanan aki, ki beneficio gobierno di Trump kier realiza cu esaki? E idea ta cu haciendo importacion na Merca mas caro lo incentiva industria Mericano pa inicia produccion na e pais mes, atrobe den cierto caso. Sin embargo, esey ta un proceso cu ta tuma su tempo y den cierto caso no lo logra tampoco, entre otro pa motibo di e nivel di salario cu na Merca ta hopi mas halto. Riba con tur esaki ta resulta finalmente no tin claridad ainda, pero den un guera di impuesto di importacion tin un perdedor sigur: e consumidor. Riba tur esey ta bin e intencion di expulsa un grupo considerable di migrante cu ta absolutamente clave den varios sector economico, manera agricultura, loke por bay afecta prijs pa consumidor mas ainda.

Tin mas asunto pa tuma na cuenta. E guera na Ucrania ta tumando un rumbo peligroso cu por bay afecta economia mundial atrobe. Despues di casi tres aña di guera, cu a costa bida di cienmiles y un daño material enorme, ta yegando e fase unda tin cansancio y agotamento di recurso na ambos banda. E lista grandi di sancion imponi riba Rusia ta tumando efecto y e perdida di gran parti di e poblacion Ruso cu por a usa como militar ta obligando na envolvimento di Corea di Norte di un banda, y mayor envolvimento di e paisnan Europeo den e conflicto. Aña 2025 por cuminza riba mal pia, tambe den sentido economico cu un crecemento global menos bon cu tabata spera te awor. Un señal di esaki ta cu e proximo cumbre di Opec+, cu Saudi Arabia y Rusia como protagonista principal, por scoge pa no aumenta producciony asina mantene prijs di crudo halto, en vista di e demanda mundial modera cu ta anticipa. Cualkier suceso mas negativo riba tereno militar lo por afecta produccion y oferta, loke por causa un aumento fuerte di prijs di petroleo, cu tin su efecto riba tur producto, mirando e importancia di combustible den agricultura, industria y transporte.

Kico tur esaki por significa pa nos economia y comunidad? Cu ta importante tene na cuenta cu e reduccion anticipa di inflacion importa por resulta den lo contrario, afectando mas ainda e hogarnan di menos ingreso. Un nivel halto di prijs di petroleo, manera ilustra, lo causa cu baha prijs di awa y coriente lo ta ilusorio. Manera treci dilanti den otro Editorial recientemente, no tin ningun cambio positivo, ni di gas natural ni hidrogeno, ni energia di biento o solar, pa reemplaza fuel oil na WEB como combustible principal. E partido cu ainda ta desea di campaña cu baha prijs di coriente lo mester splica ta con ta logra esey…

Finalmente, mester contempla e posible efecto di un reduccion di actividad economico cu caida den poder di comprana Merca, riba turismo y indirectamente riba beneficio pa gobernacion. Un cambio negativo limita pa sector turistico ya por tin como consecuencia cu surplus pa gobierno ta cay back te na nivel di 1% di GDP, loke ta elimina recurso pa inversion, ya cu tur loke drenta lo ta pa paga debe. Cu e perspectiva aki ta bira mas importante ainda yega na ataca e inflacion local, cu tin como causante principal e sistema cumulativo di BBO. Nos no ta tende nada ainda…