Coreccion: E articulo a duna e impresion cu e 4mil florin pa cuartal ta pa subsidio di salario. Sinembargo, e subsidio di salario ta apart.

Minister Xiomara Ruiz-Maduro di Finanzas, Asuntonan Economico y Cultura a presenta e plan pa subsidia salario, manera cu conseho di minister di Reino a pidi, den corto. Negoshinan chikito y mediano cu perde mas cu 25% di nan ganashi lo por bin na remarca pa subsidia te cu 80% di e salario di trahado cu nan no a kita. E suma lo consisti di 4000 florin pa cuartal.

E subsidio di salario tin como meta pa e trahado mantene su trabou cu su salario durante e crisis causa pa COVID-19, pa asina evita cu e trahado mester bay pidi ayudo FASE y pa e pago di primanan di AZV y SVb por sigui mas cu por. Cu e subsidio, empleadonan cu ta gana te e maximo normalmente cubri pa SVb — 5.850 florin — por haya nan salario subsidia por medio di e compania. Esaki kiermen cu e compania ta haya e subsidio pa parti na su trahadonan.

Condicionnan.
E condicionnan general pa un compania por haya e subsidio di salario ta entre otro cu no por a retira ningun trahado desde 15 di maart 2020, cual ta e fecha riba cual COVID-19 a manifesta na Aruba. E compania mester sigui paga e trahado 100% di su salario, cu excepcion solamente si ambos partido a yega na un acuerdo mutuo pa baha e salario temporalmente. Esaki kiermen cu si salario a baha na 80%, gobierno ta subsidia e 80% (cual ta e maximo), mientras e doño di trabou tin cu cumpli cu e 20% cu ta resta. Ta paga e subsidio a base di e informacion den SVb entrante 15 di maart 2020. Lo bay tin mas detayenan den e condicionnan, cual gobierno lo bay duna den futuro.

Actualmente no ta bay den detaye di cuanto esaki lo costa Aruba, pasobra esey lo bin haya sa despues cu conseho di minister di Reino bin na su decision, segun Ruiz-Maduro.

37 mil trahado lo por keda na trabou.
Desde ultimo biaha cu a anuncia FASE, cual tabata prome cu e medida di shelter in place a bin na vigor, gobierno a calcula cu un cantidad di 25 mil trahado lo a of lo perde trabou, primordialmente den sector hotelero. Desde cu esaki a tuma luga, gobierno a bin cu un calculacion nobo basa riba tur e negoshinan cu mester a cera of minimalisa operacion pa via di shelter in place. Kiermen cu a bin 12 mil trahado riba e cantidad cu tabatin caba. Esaki ta nifica cu un cantidad di 3.317 compania lo por haya ayudo pa paga nan trahado. Cu e plan aki ta spera tambe cu lo bin menos deficit pasobra ta sigui paga prima di SVb y AZV.

E programa di subsidio di salario ta bay complementa e ayudo di FASE, banda di tur e otro medidanan di apoyo fiscal y regular cu gobierno tin y ta introduciendo den e crisis aki.