Subrino ta nenga di ta envolvi den caso Wayaca

Po Sing Fang miho conoci como Stevie, a laga sa via di su abogado Chris Lejuez cu e no tin nada di haber cu e morto di su tanta.

Stevie a wordo deteni dia 23 di september bou sospecho di ta envolvi den e caso Wayaca. E otro sospechoso J.E. tin nacionalidad Hulandes y ta naci na Boneiro (e posibel tirado). Sr. Lejuez a confirma cu J.E. ta un conoci di su cliente, pero su cliente no tin nada di haber cu e morto di su tanta Shasha. J.E. a yega di traha den pasado pa Stevie y cu awo leu a leu lo ta haci algun trabou pa su cliente.

Riba dia di e incidente J.E. a pidi Stevie si e por a bah’e na Wayaca den oranan di merdia. Pero segun abogado Lejuez ta conta Bon Dia Aruba su cliente no a baha J.E. na cas di su tanta. Mas durante dia Stevie ta haya un yamada di J.E. puntrando e si e por a bin busca J.E. na Sport Boys y bay bah’e na su cas. Despues di basta rato Stevie a tende locual a pasa cu su tanta.

Mas laat durante dia Stevie tabatin contact cu J.E. pa si e por a yud’e cu algun trabou na e Art Fair na San Nicolas. Den e auto Stevie a ripara cu J.E. tabata herida y cu e tabatin un saco di sushi cu ne. Stevie mes a yuda J.E. cu e herida pa despues J.E. a puntra Stevie si e por a hib’e banda di Palo Marga. Unabes na Palo Marga, J.E. a haci e saco bashi y a kima e pañanan cu tabatin aden. Despues Stevie a baha J.E. bek na cas. Ta na es momento ey cu Stevie a realisa cu J.E. tabata envolvi den e asesinato na Wayaca.

Bon Dia Aruba a puntra abogado Lejuez tambe si ta posibel cu por tin otro miembronan di e famia envolvi den e caso, pero e ta contesta cu e no sa nada di esaki. Unico cos ta cu su cliente ta nenga di ta envolvi den e tiramento di su tanta.